Charter Document - 07030600

Venerabili in Christo patri et domino si libeat reverendo domino Dei gracia Eboracensi [] Godfridus permissione Ejusdem ecclesie Wygorniensis minister salutem et tanto patri reverenciam debitam cum honore Vicium cupiditatis abesse presumitur quociens pro eterne salutis commodo non pro lucro temporali juste petitur quod optatur Sane litteras vestre paternitatis per dominum Ricardum de Bathamtone vestrum capellanum et secretarium nobis exhibitas reverencia qua decuit recepimus inter cetera continentes quod ob honorem et reverenciam Altissimi ornamenta ecclesie vestre Eboracensis que bone memorie Walterus germanus noster vester predecessor eidem contulit dum vivebat ad vestram supplicacionem restitui faceremus In hiis et aliis que nobis exposuit idem vester capellanus sibi plenam fiduciam adhibentes licet igitur ornamenta predicta possemus penes nos tenuisse de jure ad minus quousque de collacione facta et possessione vestre ecclesie fuisset plene discussum volentes tamen vestre paternitati in hiis et aliis quantum possumus complacere ad quod zelus domus vestre sancte cui prefuit noster germanus pretactus et cujus beneficium sensimus cum promoti fuimus in eadem et precipue finium natalium contiguitas ac antique amicie inter nos diu concepte sincera dileccio nos excitant et inducunt ac ne nota ambicionis nobis quoquo modo possit impingi dum studuimus novit Deus hujusmodi ornamenta non nobis appropriare set in pios usus pro anima defuncti disponere convertenda ipsa omnia predicto vestro capellano et secretario commisimus vobis fideliter deferenda scituri quod quecumque in nostra capella et alibi apud nos quantumcumque preciosa fuerint ad vestre paternitatis beneplacitum sunt parata Valeat vestra paternitas semper in Christo Datum apud Westone sub Eyre ii Idus Septembri Anno gratie MCC octogesimo