Charter Document - 07030589
| Charter Number: | 07030589 |
|---|---|
| Cartulary Title: | The Register of William Wickwane, Lord Archbishop of York, 1279-1285 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1279 |
| Date type: | Internal, Calendar, Papal |
| Resource Link(s): |
Borthwick Institute - Register 3 (f56r) |
Charter:
Nicholaus episcopus servus servorum Dei venerabili fratri archiepiscopo Eboracensi salutem et apostolicam benediccionem Cum dilectus filius Nicholaus presbiter de Ottelay lator presencium fuerit sicut asserit a bone memorie Gregorius predecessore tuo in presbiterum ordinatus nec ullum sit ecclesiasticum beneficium assecutus nos felicis recordacionis Innocencii pape predecessoris nostri qui ordinatis sine certo titulo per ordinatores seu presentatores vel successores eorum provideri voluit vestigiis inherentes fraternitati tue per apostolica scripta mandamus quatinus si dilectus filius abbas monasterii Sancte Marie Eboracensis cui examinacionem ipsius presbiteri duximus committendam te citato legitime ut per te ipsum vel ydoneum responsalem intersis et tam super idoneitate persone quam eciam super qualitate et quantitate beneficii proponere tibi liceat quicquid racionabiliter duxeris proponendum eum ydoneum esse repperit et ecclesiastico beneficio non indignum tam diu ei vite necessaria congrue subministres donec per te competens ecclesiasticum beneficium fuerit assecutus Quod si eum ad presentacionem alicujus vel aliquorum ecclesiasticorum virorum qui ei providere possint in competenti ecclesiastico beneficio predecessor ipse tuus promovit per presentantem vel successorem ipsius si forte ille decessit juxta prescriptam formam ei facias provideri sciturus pro certo quod si per examinacionem ipsius fuerit repertus ydoneus et tu ei juxta mandatum apostolicum neglexeris providere cum nobis id per ejus litteras innotuerit te ad id exequendum compelli sicut expedit faciemus Data Roma vi Idus marcii pontificatus nostri anno secundo