Charter Document - 07030552
| Charter Number: | 07030552 |
|---|---|
| Cartulary Title: | The Register of William Wickwane, Lord Archbishop of York, 1279-1285 |
| Charter Language: | Latin |
| Charter Origin: | Religious |
| Charter Type(s): | Order |
| Date: | 1282 - 1283 |
| Date type: | Assigned |
| Resource Link(s): |
Borthwick Institute - Register 3 (f50r) |
Charter:
W[illelmus] [] dilectis [] Descendit pastor excelsus ovem querere perditam et ultro medicus salutaris venit ad egrum ut idem pastor et medicus ovem ad ovile suis humeris reportaret et egri langores pariter et dolores ferret medicinaliter in se ipso Summi itaque pastoris exemplum sanctissimum quatenus humana sinit fragilitas piis visceribus amplectentes ecce Ricardum de Witewelle concanonicum vestrum exhibitorem presencium qui post innumeras tribulaciones et dira corporis tormenta que vagis seculi fluctibus se miserabiliter exponens sustinuit jam novissime sinum intrans consciencie ad claustrale gremium redire appetit regularis discipline injuncta humilime subiturus ad vestre mansuetudinis remedium decernimus remittendum devocionem vestram in virtute sancte obediencie attencius exhortantes quatinus predicto fratri vestro ad vos humiliter declinanti aperiatis viscera pietatis ipsum sicut ordini et regulari discipline convenit temperato rigoris stimulo pertractantes ne tanquam ovis perdita illius morsibus exponatur qui in giro circuit querens quem devoret et pervertat Porro decet vos ut agnoscatis vultum pecoris vestri et ad gregem proprium errantem oviculam alacri promptitudine revocetis Datum []