Charter Document - 07030492
| Charter Number: | 07030492 |
|---|---|
| Cartulary Title: | The Register of William Wickwane, Lord Archbishop of York, 1279-1285 |
| Charter Language: | Latin |
| Charter Origin: | Religious |
| Charter Type(s): | Request |
| Date: | 1279 - 1285 |
| Date type: | Assigned |
| Resource Link(s): |
Borthwick Institute - Register 3 (f46v) |
Charter:
Reverendo in Christo patri et amico expertissimo domino Bentivengi [] Grates pater debitas rependere non sufficimus seu condignas pro graciis quas vestre munificencie grata liberalitas nobis jugiter ministravit Sed ecce nos et nostra vestris beneplacitis exponimus pro continuatis beneficiis et presertim pro tam solido et circumspecto consilio quod procuratoribus nostris in Curia super petiticione in visitacione nostra in proximo inibi facienda tam prona promptitudine acceptantis impendistis amantissime paternitati vestre devocius supplicantes quatinus procuratores nostros quociens vestre occurrerit presencie unacum negociis nostris in sacra Curia promovendis habere velitis solita benivolencia commendatos Et quidem note probitatis virum magistrum Johanne Clarelle domini pape capellanum ac domini regis Anglie illustris solemnem nuncium ad complendum visitacionis nostre debitum ut est moris procuratorem nostrum duximus deputandum quem si placet cum vestram sinceritatem requisierit super peticione velitis pro nobis proponenda favorabiliter informare Eidem siquidem injunximus quod juxta vestrum confidentissimum consilium et preceptum operetur prudencius in hac parte Et ecce pater amicissime vestro sacerdoti humillimo precipiendo nunciabitis per singula velle vestrum Conservet incolumitatem vestram Altissimus per tempora felicia successive