Charter Document - 07030486
| Charter Number: | 07030486 |
|---|---|
| Cartulary Title: | The Register of William Wickwane, Lord Archbishop of York, 1279-1285 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1281 |
| Date type: | Internal, Calendar, Episcopal |
| Resource Link(s): |
Borthwick Institute - Register 3 (f46r) |
Charter:
Suo magistro Roberto de Tadecastria Sollicitam diligenciam quam circa negocia nostra procuranda vos re ipsa adhibere perpendimus intime commendantes rogamus quatinus solita promptitudine unacum magistro Willelmo de Bolingtone viriliter nostris commodis insistatis subdolas adversancium cautelas circumspeccius precaventes ne vos decipiant aliqualiter vel illudant et nos ad vestri commodum effective vigilabimus Domino concedente temporibus oportunis Ceterum scribimus magistro Willelmo de Bolingtone quod pecuniam quam pro salariis advocatorum et aliis quibuslibet nostro nomine erogastis vobis numeret indilate et quod procuratoribus de audiencia tam pro tempore predecessoris nostri quam pro nostro de vestro consilio satisfacere procuret ne littere pro nobis impetrande per eos de cetero impediantur nec molestiam nobis inferant seu gravamen Littere nostre quas cardinalibus dirigimus per vos et prefatum Willelmo singule singulis porrigantur quibus re gradiamur studiosius ex eo quod procuratoribus nostris in negociis nostris consilium impendunt graciosius et favorem et precipue domino Jordano et A[ncero] quibus excepto domino H[ugone] cui specialius scribimus super istis Ad hec domino H[ugoni] cardinali scripsimus quod de consilio suo si de capituli nostri processerit assensu et viri ydonei communes amici se obtulerint in quos valeat compromitti quantum in nobis est sustinebimus quod controversia inter ecclesias per viam compromissi finaliter decidatur Scimus tamen quod quandocumque a jure communi recesserimus juri nostro detrahetur et vix inveniri poterunt persone in quas partes consenciant ad tam arduum negocium terminandum Deliberabimus igitur plenius in hac parte et vobis alias rescribemus quid senserimus super istis Litteras Tusculani per magistrum Thomam de Corbrigge propter persone noticiam eidem porrigi volumus et mandamus Si causa nostra in Anglie debeat agitari procuretis modis omnibus quod hec rescripto clausula adiciatur videlicet quod infra certum tempus instructa vel non instructa ad Curiam remittatur Datum apud Cawode x Kalendas Novembri pontificatus nostri anno tercio