Charter Document - 07030470
| Charter Number: | 07030470 |
|---|---|
| Cartulary Title: | The Register of William Wickwane, Lord Archbishop of York, 1279-1285 |
| Charter Language: | Latin |
| Charter Origin: | Religious |
| Charter Type(s): | Recommendation |
| Date: | 1280 |
| Date type: | Internal, A.D., Calendar |
| Resource Link(s): |
Borthwick Institute - Register 3 (f44r) |
Charter:
Sanctissimo in Christo patri et domino reverentissimo Martino Dei providencia summo pontifici suus humilis servulus et sacerdos W[illelmus] permissione Ejusdem Eboracensis cure custos et minister Anglie primas cum recommendacione devota et subjeccione omnimoda devota pedum oscula beatorum Eya cordis jocunditas te ipsam extollas in dignas laudes et gracias mee mentis modicitas in congratulationem prosiliendo profluas pro rumore Postquam enim luctuosum et lamentabile novum michi nuper sub tristicia et merore insonuit ecce nova insignis leticie mee inconsolabili mesticie divine consolacionis gracia recencius recreaverunt Ipse siquidem virtuose nitens Nicholaus qui me in honorem sui gracia constituit et creavit dereliquit heu subito suam creaturam undique desolatam sed in reverentissimi et mitissimi Martini patris precordialis et domini deinceps munificencia exultanter et jocundius respirabo ex vocacione et honore tanti patris indeficientem leticiam hauriendo Pater reverende cuncti nostratis vestri eciam noticiam non habentes mire extollunt super cacumina tectorum et moncium et beate predicant nomen vestrum Utinam beatitudinis premio mundialibus devictis preliis premetur et quoad vixero me pro modulo meo in suffragia oracionum pro onere vobis infixo in precordiorum intimis immolabo Ecclesiam Eboracensem imbecillitati mee commissam unacum ministris et procuratoribus me et ipsam contingentibus cum ad vestre sanctitatis pedes pervenerint genis et genibus recommendo Si vero circa Eboracensis et Cantuariensis ecclesiarum pacem et concordiam vestre placuerit prudencie ad meritum meditari de unitate Anglicane ecclesie plus solito gauderetis quia dum colluctacionibus colliduntur corruit sacerdocium et est cuilibet ad digitum dissidens et divisum et gravis cissura ex litibus primacie forsan periculose proveniet et erumpet prout exhibitor [presencium] succincius si placeret vobis pericula reseraret Hoc igitur per vos Deo duce finaliter et feliciter consummabitur quod per nullum potuit hactenus aliquatenus adimpleri Et hic spem pregrandem quin pocius solidam certitudinem ponimus et prefigimus coram Christo Conservet vos utilitati universalis ecclesie sue Deus per tempora longiora Reverentissimo et precordialissimo in Christo patri domino Matheo Dei gracia Sancte Marie in Porticu dyacono cardinali vester devotissimus et humilimus sacerdos Willelmus [] cum votiva reverencia jocunditatem continuam et honorem Pater predilecte vestra nobis nunciata desolamina nos sub gravi mesticia et intima compassione cordis efficiunt desolatos set vestra resurgente leticia et ad disposicionem Dei vestra triumphante fortuna congratulantes leta bimus sicut vester nec vos si placeat in pressuris hujusmodi cordis proprii deserat consolamen Cedent enim ignominiosa hujusmodi in meritum et gloriam ante Deum Pater si penes nos aliquid volueritis quod possimus illud hylari voluntate complebimus juxta vires Negocia ecclesie nostre Eboracensis et nostra que procuratores nostri pro nobis et seipsis procurant in Curia vestre sincere benivolencie recommendamus fiducialiter et ex corde Conservet vos ecclesie sue sancte Deus per tempora longiora Datum apud Bermundesay vj Kalendas Januarii Anno gratie MCC octogesimo