Charter Document - 07030464
| Charter Number: | 07030464 |
|---|---|
| Cartulary Title: | The Register of William Wickwane, Lord Archbishop of York, 1279-1285 |
| Charter Language: | Latin |
| Charter Origin: | Religious |
| Charter Type(s): | Complaint |
| Date: | 1280 |
| Date type: | Internal, A.D., Calendar |
| Resource Link(s): |
Borthwick Institute - Register 3 (f39r) |
Charter:
Reverendo et precordiali in Christo patri domino J[ordano] Dei gracia Sancti Eustachii diacono cardinali suus devotissimus sacerdos W[illelmus] eadem gracia Eboracensis ecclesie minister humilis Anglie primas seipsum totum et cum continua oracionum instancia votivam reverenciam et honorem Spes et pregrandis vestre dulcedinis confidencia michi prebet intrepide velud vestro votivo servulo audaciam supplicandi confidentissime pater Ad partes Anglicanus sospes redii Deo duce sed erecto vexillo crucis Christi primacie signaculo in medio maris Anglicana et quiete per dyoecesim Cantuariensem delato demum in Roffensi dyoecesi et Londoniensi nichil nisi improperia conflictus violencias et vilia per magistrum Adam de Hales tunc officialem domini Cantuariensis archiepiscopi et alios commensales ipsius repperi are status qui crucem meam in ignominiam Crucifixi apud Roffam cum effronti equorum et inhumane irrupcionis impetu inhumaniter confregerunt sed aliam benedictus Altissimus paulo ante michi allatam mox erigi feceram et deferri Idemque officialis varios et frequentes insultus in me et meos in meo transitu iterum facere non omisit Pater reverende injurias meas quin pocius Dei et digne Sedis Apostolice offensas et gravamina que fecerunt longum foret sine legencium tedio nunciare sed domino pape sceleris seriem plenius explico per scripturam Vestram dominacionem instancius exorando quatinus littera mea per vos si placet cum videritis oportunum eidem super premissis injuriis porrigatur ut per viam dulcedinis et ordinacionis salvo statu ecclesie mee collisio et frequens concussio Eboracensis et Cantuariensis ecclesiarum amodo conquiescat et vos ipsi si placet pro misericordia Dei ordinacionem utilem et utrique ecclesie fructiferam procuretis vel ad minus nisi felicius contigerit constitucio super possessione juris vel quasi crucis per totam Angliam deferende fructu non careat vel effectu quin statum pacificum juxta ejusdem canonis exigenciam habeam in futurum Et si quid pater reverende penes devotum et pronum presbiterum vestrum volueritis ecce quamdiu vixero totus vester Hec si placet amantissimo amico et benivolo meo domino Matheo communicare peto et eciam magistro Benedicto de quo confido intime et ex corde ut quilibet benivolus manum applicet adjutricem Ceterum non inmemor dicti vestri quod dominum Neapolionem utpote stirpis masculine memoriale magnificum et tocius parentele predilectum flosculum intime diligitis negocium ipsius erga capitulum nostrum Eboracense feci utiliter adimpleri et pretextu commodi et honoris prebendam suam que totaliter vel fere in laboriosa agricultura consistit et inter silvestres et voluptarios ministros et ballivos patrie collocatur ad triennium pro c marcis eidem singulis annis solvendis ad firmam cepi de proprio commodo novit Omnipotens non curando sed in hoc gratitudo me dirigit allicit et accendit ne in sua novitate tanquam desperans afficeretur tedio vel jactura Conservet vestram dominacionem ecclesie sue sancte per tempora longiora Data apud Burton kalendas Aprilis anno gratie MCC octogesimo