Charter Document - 07030456

Willelmus permissione [] venerabili in Christo fratri domino [Radulpho] eadem gracia Karleolensi episcopo salutem et sincere caritatis in Domino semper augmentum Cum generali visitacione nostra super clerum et populum civitatis et proprie dyoecesis nostre Eboracensis secundum statuta sanctorum patrum quantum ad nos attinet primitus expedita disposuissemus postmodum juris ammonicione pulsati per totam provinciam nostram super clerum et populum visitacionis officium juxta juris exigenciam exercere ac sic ex quadam affeccione peculiari quam ad civitatem et dyoecesim Dunelmensem ut pote nobis viciniorem habemus illuc deliberassemus ab inicio declinare nichil aliud intendentes novit Deus nisi miseras et deceptas animas eripere medicinaliter a faucibus inimici et affeccione pia ad ovile salutis in compassionis humero reportare quia post citaciones et moniciones legitimas et salubres venerabilem fratrem notorium suffraganeum nostrum episcopum et capitulum ecclesie Dunelmensis cum quibus egimus quantum potuimus civiliter et modeste inexcusabiliter contumaces ut vituperiosiora taceamus invenimus et rebelles eundem dominum episcopum suffraganeum nostrum ac priorem subpriorem precentorem sacristam celerarium camerarium fratrem Rogerum de Methelay monachum et Willelmum de Fennum clericum ejusdem domus Dunelmensis pro eorum propriis culpis cum omnibus suis auctoribus fauctoribus consiliariis seu consensum aut favorem sibi vel ipsorum alicui per se vel alium clam vel palam facto vel verbo quomodolibet prestantibus in crimine sic dampnato in scriptis solempniter et publice pontificalibus induti excommunicavimus et anathematizavimus justicia exigente nihilominus in detestacionem tanti criminis pro notoria capitis majorum et aliorum ejusdem domus inobediencie apostasia ecclesiam ipsam cathedralem ecclesiastico supponentes districcius interdicto Cum igitur jure canonico caveatur cure sit omnibus episcopis excommunicatorum nomina tam vicinis episcopis quam parochianis pariter indicare ut excommunicati rubore suffusi ad humilitatis graciam et reconciliacionis affectum facilius inclinentur ad quod coepiscopi de jure tenentur sibi mutuum consilium et auxilium impertiri vobis in virtute sancte obediencie in qua ecclesie Eboracensi matri vestre metropolitice astricti estis et sub pena canonice districcionis firmiter injungendo mandamus Aliis autem episcopis non suffraganeis scribitur ita post illud verbum impertiri Reverende paternitati vestre zelo justicie cui nos omnes proni obsecundare tenemur et sub spe vicissitudinis rependende pro tempore oportuno cum instancia debita supplicamus quatinus rectitudinis oculo attendentes quod juxta juris doctrinam ferro abscindenda sunt vulnera que fomentorum non senserint medicinam prefatum suffraganeum nostrum ac priorem et omnes alios prenotatos sic a nobis ex causa predicta excommunicatos esse ac ipsam ecclesiam cathedralem sic suppositam interdicto per totam dyoecesim vestram diebus Dominicis et festivis solempniter et publice denuncietis seu denunciari faciatis ut ipsi forsan confusione bona cogente ad judicium consciencie revertentes ad gremium sancte matris ecclesie sue studeant cicius remeare et nos vobis vicem majorem in consimilibus reddere teneamur Quid igitur super premissis ad mandatum nostrum ad instanciam nostram duxeritis faciendum nos per litteras vestras patentes harum seriem continentes studeatis non displiceat reddere cerciores Conservet [] Datum apud Langacestre in crastino sancti Johannis Baptiste anno gracie MCC octogesimo primo