Charter Document - 07030454

In Dei nomine Amen Cum nos Willelmus permissione divina archiepiscopus Anglie primas secundum statuta sanctorum patrum patriam civitatem et propriam dyoecesim nostram Eboracensem super clerum et populum ejusdem dyoecesis nostre tramitibus ex tradicione juris in hoc casu per omnia observatis nuper ex officii nostri debito quantum ad nos attinet visitasse mus disponentes postmodum precipue auctoritate constitucionis Concilii Lugdunensis sub Innocentio papa quarto celebrati per totam provinciam nostram secundum formam constitucionis ejusdem visitacionis officium exercere ac sic ex quadam affeccione precordiali ad civitatem et dyoecesim Dunelmenses solum ad salutem animarum superiorum et inferiorum cleri et populi ejusdem civitatis et dyoecesis quorum quosdam audivimus super quibusdam [s]celesti oribus infamie nota respergi gracia visitacionis salubriter impendende descendere primitus intendentes venerabili fratri nostro domino nunc Dunelmensi episcopo ac priori et conventui ejusdem ecclesie cathedralis nostris litteris quarum copiam penes nos sub manu publica retinemus diu est dederimus in mandatis ut se in crastino Sancti Johannis Baptiste hoc instanti anno Gracie MCCLXXX primo cum effectu pararent officium visitacionis nostre quam ipsis in basilica sedis ejusdem cum omni dulcedine suavi impendere cordi quam plurimum nobis erat secundum juris exigenciam recepturos Ecce nunc post adventum nostrum in partibus istis ex frequenti relacione fidelium audivimus pro constanti quod quam plures iniquitatis filii sedentes in insidiis ac solum versantes in manibus et corde maligno dolos et obices per comenta non solum extraneas et incognitas immunitates singulares contra universalem et notoriam ordinariam jurisdiccionem nostram ac eciam contra generalem universalis ecclesie consuetudinem et morem omnium metropolitanorum ubi libet observatum pro libito suo subdole et falso confingunt solam diuturnitatem temporis invalidam et nullam aliam causam vel titulum aliquem allegantes se eciam erecta cervice et animo infrunito contra visitacionem nostram et nostri exercicium officii contumaces ausu sacrilego per nepas et obstacula actualia preparant et rebelles in grave animarum suarum periculum ac ecclesiastice libertatis et metropolitani juris nostri prejudicium manifestum Quoniam igitur exempla presencium cavere nos premonent in futurum dantibus occasionem huic processui et facto nostro preteritis quorumdam culpis et offensis de quibus per litteras mandata dicta et facta certas conjecturas verisimiliter optinemus nos jus et libertatem ecclesie nostre et nostrum de quo certi sumus armis quibus possumus spiritualibus defendere intendentes auctoritate Dei Patris Omnipotentis ac gloriose Virginis Marie et Beati Petri Apostoli patroni nostri omnes illos et singulos qui visitacionem jurisdiccionem et officium nostrum in predictis et circa ea modis predictis vel aliis per maliciam aut fraudem vel injuriam hactenus impediverunt seu impediri fecerunt aut decetero impediverint seu impediri fecerint vel procuraverint facto vel verbo litteris vel nunciis clam vel palam per se vel alium consilio auxilio consensu favore vel alias quoquo modo nisi infra octo dies pro trina monicione computandos a tempore noticie hujus processus nostri resipuerint penitentes et animo prono fideliter et cum effectu satisfaciendi nobis de injuria hujusmodi destiterint a presumptis in hiis scriptis solempniter et publica auctoritate metropolitica excommunicamus anathematizamus et a liminibus sancte matris ecclesie abicimus atque usque ad satisfaccionem congruam ab omni fidelium consorcio sequestramus et insuper in quantum jura et libertates ecclesie nostre Eboracensis quam notorium est ecclesie Dunelmensi metropolitico jure preesse et ideo ad ipsam hujusmodi visitacionem provincialem jure communi spectare brachiis sic extentis per maliciam infringere seu perturbare contendunt aut hactenus contra justiciam perturbarunt excommunicatos esse publice denunciamus Fiat Fiat Amen Datum et actum apud Scyreburne juxta Dunelmum In crastino Sancti Johannis Baptiste Anno gratie MCC octogesimo primo et pontificatus nostri secundo