Charter Document - 07030453

In nomine Domini Amen Cum vos reverende pater W[illelmus] Dei gracia Eboracensis archiepiscope civitatem et dyoecesim Dunelmenses visitare intendatis ut verisimilibus et probabilibus conjecturis apparet ego Willelmus dictus Ruffus clericus procurator cleri civitatis et dyoecesis Dunelmensium vos suspectum postulo et pono in negocio visitacionis predicte exercende ac ut suspectum recuso pro eo quod vos jus vobis dicere nitemini in visitando dictas civitatem et dioecesim quod nullus potest sibi in sua causa facere et quod in possessione hoc faciendi non estis cum nec vos nec aliquis predecessorum vestrorum hec fecisse com probemini set clerus et populus dictarum civitatis et dyoecesis a tempore cujus contrarium non extat memoria ab hujusmodi visitacione sit liber et immunis Et peto ut vos mecum communiter vel alio modo arbitros eligatis in forma juris qui de hujusmodi suspicionis causa cognoscant Ad quod et eciam ad probandum suspicionis causam quatenus in facto consistit cum arbitri electi fuerint nomine dominorum meorum et pro ipsis loco et tempore oportunis in forma juris offero me paratum a premissa recusacione non recedendo ego procurator predictus protestor nomine dominorum meorum predictorum me habere excepciones validas et efficaces pro loco et tempore contra vos reverende pater et vestram visitacionem predictam proponendas in forma que sequitur Excipiendo propono ego procurator cleri civitatis et dyoecesis Dunelmensium contra vos venerande pater domine W[illelmus] Dei gracia Eboracensem archiepiscopum et vestram visitacionem quam facere intenditis in civitate et dyoecesi Dunelmensibus quod vos ad ipsam visitacionem exercendam procedere non potestis nec de jure debetis vestro capitulo civitate et dyoecesi Eboracensibus non plene visitatis nec aliqua negligencia dyoecesani loci ipsius ad vestram nocionem perducta cujus obtentu in forma juris ad visitandum dictas civitatem et dyoecesim procedere possetis etsi in possessione dicte visitacionis essetis quod non fateor Item excipiendo propono quod etsi visitacioni metropolitice quoad clerum Dunelmensis dyoecesis faciende locus esset vos dominum archiepiscopum tamen ad presens dyoecesano nostro episcopo videlicet Dunelmensi ac ejusdem capitulo nondum visitatis ad ecclesiarum nostrarum singularium visitacionem auctoritate metropolitica faciendam admittere non tenemur nec nos ad predictam visitacionem suscipiendam de jure compellere potestis nec debetis Item cum clerus civitatis et dyoecesis Dunelmensium illa hactenus sit gavisus libertate plenaria ut nullo unquam tempore aliquis Eboracensis archiepiscopus in possessione vel quasi extiterit visitacionis officium in eundem clerum exercendi set a tempore fundacionis ecclesie Dunelmensis idem clerus a visitacione metropolitica sit et fuerit prorsus liber et immunis et in possessione vel quasi hujusmodi libertatis predicte hactenus sit et fuerit inconcusse necnon et super hiis specialibus privilegiis sufficienter munitus que paratus sum debite exhibere coram judice competenti vos dominum archiepiscopum Eboracensem ad visitacionis officium exercendum admittere non tenetur nec ipsum clerum propria auctoritate ad vestram visitacionem suscipiendam compellere de jure potestis vel debetis Et ne vos domine archiepiscope vel quivis alius vestra auctoritate ipsum clerum in dicta sua possessione vel quasi non percipiendi visitacionem metropoliticam molestetis inquietetis aut perturbetis molestet inquietet aut perturbet minus juste aut spretis recusationi bus aut excepcionibus predictis clerum aut populum ei creditum compellatis ad vestram visitacionem suscipiendam vel ea occasione sentencias suspensionis interdicti vel excommunicacionis in personas eorum vel eorum loca proferatis aut proferri faciatis sacrosanctam Sedem Apostolicam in hiis scriptis provoco et appello et apostolos instanter peto supponens dictum clerum et ejusdem loca ecclesias et populum eidem creditum et omnia bona predicti cleri mobilia et inmobilia proteccioni et defensioni sacrosancte Sedis Apostolice supradicte