Charter Document - 07030440

Ad celebrem laudem Altissimi et ad votivam exaltacionem sancte religionis nos Willelmus [] vj nonas Maii anno Gratie MCCLXXXJ in prioratu de Kertemel in archidiaconatu Rychemundie visitacionis et inquisicionis incumbens et adherens officium diligenter exercentes ea que reformanda comperimus paterno affectu correximus in hunc modum Inprimis igitur precipimus et in virtute sancte obediencie priori injungimus et conventui quod debitam silencii observanciam irreverenter ulterius non infringant set secundum exigenciam regule discrete suis locis et temporibus sileant et loquantur Discursus eciam secularium et vilium personarum ad infirmariam refectorium et in claustrum deinceps prudenter caveant et evitent ne professionis et regule honestas per hujusmodi advenas et forte malivolos maculetur Item prohibemus sub periculo professionis et ordinis cujuslibet ne quisquis canonicorum in in claustro tempore processionis nec eciam in ecclesia vel alibi cum muliere aliqua confabuletur et si prior vel presidens causam perpenderit necessariam cum aliqua muliercula colloquendi personaliter exaudiat que dicentur et non aliter concanonicum licenciet ad loquendum Item injungimus sub obtestacione divini judicii quod statuta salubria alias injuncta que regule rite conveniunt fideliter et firmiter observentur Item precipimus quod subsidium pietatis fabrice ecclesie assignatum in ipsam fabricam quatenus et quociens commode fieri poterit utiliter convertatur ne compatriote subtrahant suffragia consueta Item precipimus quod hostia claustri sint arcius solito contra extraneos custodita qui presertim proficere non poterunt nec curabunt Item injungimus sacerdotibus quod quociens mundam et puram habuerint conscienciam missas celebrent secundum regulares et canonicas sancciones Item inhibemus propter certas occasiones mali ne diebus processionum aliqua mulier in claustro processioni intersit set totaliter excludatur Item volumus et precipimus quod quilibet canonicorum sellam si quam habet cum ceteris ornamentis ad equitandum priori sine mora liberet et retrudet ut per priorem vel presidentem emittenda canonicis cum opus fuerit assignentur Item prohibemus ne aliquis canonicorum sine licencia prioris vel presidents claustrum exeat maxime venandi voluptate nec eciam alia de causa nisi necessitas et debita licencia exitum hujusmodi poterit excusare Item volumus sicut expedit omni casu quod receptor pecunie qui solus recipit contestem habeat et adjunctum qui coram senioribus racionem reddant et congrue computent bis in anno Item precipimus quod nullus deinceps de parentela cuiusquam ponatur in officiis nisi ejus industria et fidelitatis utilitas ceteros antecellet et quod onerosa superfluitas consanguineorum cujusquam infra octo dies amoveatur totaliter per priorem Item decernimus quod quicumque habitum gerat hujus monasterii suamque professionem fecerit in hoc loco sunt sub canonica obediencia prioris sui quamdiu prior in administracione tolleratur cujus conscienciam oneramus coram Deo ut omnem torporem et accepcionem personarum abiciat et deserat erga gregem ut in fine mercedem eternitatis recipiat de labore Premissa igitur primo die cuiuslibet mensis in pleno conventu sub pena suspensionis cujuslibet officii quo ad secundum subsequentem diem evidenter et publice recitentur Datum et actum in capitulo de Kertemel die et anno supradictis