Charter Document - 07030437

Nos Willelmus Dei gracia [] vj idus Junii anno Gracie MCCLXX inquisicionis et visitacionis officium in prioratu de Thurgertone votivis viribus exercentes defectus quos ibidem reperimus ad honorem Dei correximus in hunc modum Injunximus eciam in virtute professionis et fidei quod prior decetero circa temporalia discrecius prout ad nomen ipsius pertinet studeat exercere omnem simplicitatem et torporem abiciens juxta vires ita quod de conversis monasterii vel aliis circa custodiam rerum ecclesie nulli suspecti vel inutiles amodo sicut hactenus deputentur at quod familia monasterii disciplinata decencius et instructa non remaneat ociosa Item precipimus quod idem prior inter fervorem et negligenciam in correccionibus confratrum medium discrecionis jugiter adhibeat adeo quod non sit acceptor inprovidus personarum et quod conventum suum visceraliter diligat et sequatur omnes quos sub potestate retinet in moribus et mundicia cautelis et modis omnibus conservando ita quod oracionibus leccionibus et collacionibus vacent corditer et attente et maxime collacionibus que industria et ingenio fulciuntur Injungimus eciam eidem et toti conventui sub obtestacione divini judicii quod in refectorio nulla vilis persona vel alias inhonesta deinceps aliquatenus admittatur Precipimus eciam quod in infirmaria nullus omnino extraneus seu laicus nisi medicus fuerit vel juratus veniat quoquo casu Potaciones eciam post completorium generale penitus prohibemus nisi personalis presencia ipsius prioris ac necessaria causa vel vera infirmitas hoc deposcat Inhibemus eciam ne extra plenum conventum que vis littera aliquatenus sigilletur Donaria autem que canonici vel conversi ab amicis interdum recipiunt non sibi set aliis indigentibus vel communibus usibus monasterii applicentur Silencium autem suis locis et temporibus secundum exigenciam regule districte precipimus custodiri Omnes autem discursus canonicorum et evagaciones illicitas totaliter prohibemus ne quisquam obedienciariis solum exceptis absque licencia presidents exeat claustrum suum Elemosinam eciam que imprudenter consumitur precipimus ad opus pauperum provide custodiri Item karolas et serruras canonicorum bis in anno in presencia prioris coram duobus vel tribus canonicis fide dignus precipimus aperiri ut proprietatis vicium in hujusmodi totaliter amputetur Injungimus eciam priori et conventui firmiter coram Deo quod converses suos circa devocionem et opera meritorum fideliter instruant et informent ne eorum sanguis in extreme examine a nostro vel eorum manibus requiratur Precipimus eciam quod canonici in observaciombus jejuniorum suis diebus et temporibus secundum regulam se exerceant sicut decet Canonicos autem quos extra monasterium in locis adjacentibus oporteat deservire de quindena in quindenam claustrum redeant et alii sancte vite nec suspecti ad aliam quindenam vicissim emittantur ut alter alterius alternatim onera portet Nolumus autem quod vicarius de Suttone eidem vicarie deinceps aliquatenus inmoretur set ad statum salutis et pristinum revocetur et cura alibi collocetur Hec autem in capite cujuslibet mensis in capitulo coram cunctis publice precipimus recitari Datum et actum in capitulo de Thurgertone die et anno supradictis