Charter Document - 07030435

Ad dignam divini cultus dilatacionem et ad honorem visitation sancte religionis reverencius conservande nos Willelmus permissione [] iiij nonas Julii visitacionis et inquisicionis officium in prioratu de Novo loco sub timore Dei attencius exercentes ea que correccione et informacione nostra ibidem reperimus indigere ad limam reformacionis redegimus in hunc modum Statuentes a principio quod prior circa Dei obsequium et spiritualem recreacionem confratrum spretis lasciviosis discursibus contra Deum se jugiter exerceat tanquam pastor ut ipse et grex sibi creditus malum in presenti stadio declinantes et bonum continue et cordi ter amplectentes et Deo finaliter et firmiter adherentes supernum et eternitatis bravium velud innocentes et recti sanccius consequantur proviso quod idem prior affeccione carnali cujusquam a recto moderamine corrigendi preceps non deviet vel allectus set sine acceptacione profana cadentes corrigat et sustentet et collegii consorcium caucius diligat et sequatur communem assensum in agendis monasterii zelo dulcedinis provide requirendo ita quod inepta verborum acerbitas abhinc penitus evitetur nec sumptuosis gestibus monasterium oneret quoquo modo Precipimus insuper sub virtute et testimonio Salvatoris quod subprior in officio suo licet aliquantulum infirmetur tepiditatem abiciat et libidinem evagandi ad mentem revocans et memoriam quod in infirmitate virtus perficitur Precaveat igitur et provideat in futurum sub periculo status sui quod silencium et regularis observancia secundum regulam et statuta predecessorum ad statum integre congruum revocentur Volumus et precipimus quod infirmi vere egrotantes delicacius quam sani secundum facultates monasterii amodo procurentur Potaciones autem post completorium omnino quacumque de causa firmiter prohibemus nisi infirmitas alicujus hoc exegerit egrotantis Volumus etiam et in virtute sancte devocionis injungimus quod prior unacum subpriore et congruo testimonio serruras karolarum bis aperiat vel sepius exigente suspicione proprietatis ut proprie torum vicium funditus exstirpetur Indumenta eciam de communi sar tria deinceps precipimus prout opus fuerit et expedierit elargiri distribucione pecunie penitus amputata Refectorium autem et dormitorium precipimus in tegmine commodius reparari Discursus eciam extraneorum et maxime vilium personarum per claustrum refectorium et infirmariam et septa monasterii districte interdicimus omni modo Item precipimus quod nullus extraneus laicus vel clericus nisi juratus vel medicus in infirmaria veniat quoquo casu Precipimus siquidem et injungimus coram Deo quod nulla littera decetero cum sigillo sigilletur nisi in presencia tocius conventus ejus tenor et sigillacio primitus approbetur Et volumus quod sigillum sub firma custodia fidelissime conservetur ne monasterium corruat in jacturam Robertum de Hekeling et Johannem de Tyshulle ad augmentum morum eorundem continue adhesione claustri et collegii deputamus ut non exeant quoquo modo set per priorem et presidentem secundum censuram regule ob eorum demerita pertractentur Cum autem Alanus de Castretone ad gregem rite redierit mox de consilio nostro eum precipimus in melius reformari Rogerum de Celario et Galfridum de Coquina dampnosos monasterio a domus quibuslibet officiis totaliter amovemus Et injungimus firmiter et districte quod per reddicionem compoti bis vel ter per annum status monasterii singulis apcius innotescat Hec in principio cujuslibet mensis in pleno capitulo precipimus sub obtestacione divini judicii publice recitari Datum in capitulo Novi loci die et anno supradictis