Charter Document - 07030427
| Charter Number: | 07030427 |
|---|---|
| Cartulary Title: | The Register of William Wickwane, Lord Archbishop of York, 1279-1285 |
| Charter Language: | Latin |
| Charter Origin: | Religious |
| Charter Type(s): | Mandate |
| Date: | 1280 |
| Date type: | Internal, A.D., Calendar |
| Resource Link(s): |
Borthwick Institute - Register 3 (f24v) |
Charter:
Ad preconium et honorem unici et venerandi filii Dei nos W[illelmus] permissione divina Ebor archiepiscopus [] visitacionis et inquisicionis officium in prioratu de Parco v idus Maii anno Gracie MCCLXXX propensius exercentes defectus quos ibidem reperimus paterna affeccione correximus in hunc modum In primis igitur precipimus in virtute et visceribus Salvatoris quod regula Beati Augustini et statuta felicis recordacionis Godefridi predecessoris nostri que cordi ter approbamus et in principio cujuslibet mensis recitari decernimus pronis et votivis viribus observentur Volumus eciam ad honorem religionis et regule quod indumenta et calciamenta per communem ministrum monasterii decetero cuilibet secundum quod convenit et fieri possit congrue ministrentur pecuniaria distribucione penitus rejecta Item quod canonici soli quacumque causa nullatenus emittantur nec in obsequiis magnatum qualitercumque commorentur Inhibemus insuper ne canonici extra claustrum vel alias inhoneste et maxime post completorium potacionibus cum hospitibus vel aliter vane vacent Item injungimus omnibus et singulis de conventu ne in me boscis adjacentibus vel alibi nimis spaciose sicut fieri consuevit ulterius spacientur set nec ibi nec alibi nisi necessaria causa subfuerit et de licencia presidentis Volumus eciam et decernimus quod neque corrigia neque alia onerosa seu dispendiosa domui amodo quomodo libet concedantur Necessarium eciam et decens reputamus quod silencium suis locis temporibus et terminis sanccius solito observetur Volumus insuper quod ministri monasterii ab incautis contractibus et steriles exitus procreantibus deinceps precaveant preteritis dispendiis premuniti Precipimus eciam quod compotus rerum monasterii reddatur evidencius annuatim Item ne carnes secundis et quartis feriis contra exigenciam regule a robustis et sanis amodo comedantur Item la[s]civos et indiscretos discursus canonicorum intus et extra septa monasterii sub obtestacione divini judicii firmiter inhibemus precipientes quod prior et conventus de competenti et sollicito subpriore sibi provideant indilate officia domus intus et extra per industrios fideles et mundos debite et utiliter conservando sicut Dei et nostram voluerint effugere acerbissimam ulcionem Prohibemus eciam distincte ne aliquam mulierem ad hospicium vel aliquam moram faciendam admittant sine nostra licencia speciali Datum et actum apud Parcum de Helaghe v idus Maii anno ut supra