Charter Document - 07030389

In Dei nomine Sancte et Individue Trinitatis Amen Constitute coram nobis Willelmo Dei gratia [] apud Burtone in Kendale in archidiaconatu Rychemundie iiij idus Maii anno Domini MCCLXXX primo in visitacione nostra clero decanatus de Kendale et Lounesdale ibidem convocato et presente dilectus in Christo filius magister Thomas de Grimestone clericus nobis humiliter supplicavit ut super eo quod bone memorie magister Symon de Evesham archidiaconus quondam Rychemundie sibi jure suo ordinario ecclesiam de Wartone in Kendale commendando contulit et propter ipsius ecclesie utilitatem que jure suo in multis fuerat per laycos spoliata plene et expresse commendavit sub commendacionis titulo suo perpetuo possidendam per multa tempora ante Concilium Lugdunense et super hujusmodi commendam suam patent em litteram ei fecit quam idem Thomas casu et eventu fortuito se veretur postea perdidisse indemnitati sue providere salubriter curaremus precipue cum idem Thomas paratus esset de commenda predicta et ipsius tenore per testes legitimos et omni excepcione majores et de commende ipsius amissione per sacramentum proprium vel per aliam viam juris incontinenti nos judicialiter informare Nos igitur deliberate concilio peticioni ipsius magistri Thome super hiis annuentes et ei super casu hujusmodi compacientes quatuor testes quos idem Thomas super commenda hujusmodi et ipsius forma et tenore produxit per magistrum Nicholaum de Welles tunc cancellarium et commissarum nostrum ad hoc specialiter deputatum et per Jacobum de Langetoft clericum nostrum scriptorem examinari fecimus diligenter Quibus examinatis et eorum deposicionibus publicatis invenimus evidenter quod predictus archidiaconus eidem magistro Thome ecclesiam de Wartone supradictam die Martis proxima post festum Beati Petri ad vincula Anno Domini MCCLXXX fuerunt tres decem anni elapsi caritatis intuitu commendando contulit in forma superius annotata Predicti vero magister Nicholaus cancellarius et Jacobus super amissione littere commendacionis casu fortuito juramentum ipsius magistri Thome receperunt qui juravit tactis sacrosanctis Evangeliis quod veraciter et realiter sic fuit sicut quatuor [testes] deponebant cumque predicti magister Nicholaus et Jacobus nobis quod invenerant retulissent et in scripturam omnia redegissent nos juris et equitatis doctrinam secuti eandem commendacionem in nomine Dei digne et debite acceptantes et ratam habentes et acceptam eandem ecclesiam sub commenda hujusmodi que rite facta fuerat ut puta diu ante Concilium Lugdunense duximus roborandam quam eidem magistro Thome suo perpetuo possidendam per nostras litteras patentes confirmavimus Datis et actis die loco et anno supradictis et pontificatus nostri anno secundo In cujus rei testimonium et evidenciam pleniorem huic scripto sigillum nostrum duximus apponendum