Charter Document - 07030388
| Charter Number: | 07030388 |
|---|---|
| Cartulary Title: | The Register of William Wickwane, Lord Archbishop of York, 1279-1285 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1281 |
| Date type: | Internal, Calendar, Papal |
| Resource Link(s): |
Borthwick Institute - Register 3 (f21r) |
Charter:
Martinus episcopus servus servorum Dei venerabili fratri archiepiscopo Eboracensi salutem et apostolicam benediccionem Cum dilectum filium Radulphum de Aldeburne presbiterum tue dyoecesis qui zelo fidei ac devocionis accensus signo vivifice crucis assumpto proposuit in Terre Sancte subsidium proficisci cum omnibus bonis tam ecclesiasticis quam mundanis que inpresenciarum racionabiliter possidet sub Beati Petri proteccione susceperimus atque nostra statuentes ut postquam in primo generali passagio a Sede Apostolica statuendo iter arripuerit transmarinum donec de suo reditu vel obitu certissime cognoscatur ea omnia integra maneant et quieta Fraternitati tue per Apostolica scripta mandamus quatinus non permittas eum super hiis contra proteccionis et constitucionis nostre tenorem ab aliquibus indebite molestari molestatores hujusmodi per censuram ecclesiasticam compescendo appellacione postposita attentius provisurus ne de hiis que cause cognicionem exigunt vel que personam et bona non contingunt ipsius te aliquatenus intromittas Nos enim si secus presumpseris tam presentes litteras quam eciam processum quem per te illarum auctoritate haberi contigerit omnino carere viribus ac nullius fore decernimus firmitatis Hujusmodi igitur mandatum nostrum sic prudenter et fideliter exequaris ut ejus fines quomodo libet non excedas Datum apud Urbem Veterem Nonis Maii pontificatus nostri anno primo