Charter Document - 07030329
| Charter Number: | 07030329 |
|---|---|
| Cartulary Title: | The Register of William Wickwane, Lord Archbishop of York, 1279-1285 |
| Charter Language: | Latin |
| Charter Origin: | Religious |
| Charter Type(s): | Mandate |
| Date: | 1280 |
| Date type: | Internal, Calendar, Episcopal |
| Resource Link(s): |
Borthwick Institute - Register 3 (f116r) |
Charter:
Officiali archidiaconatus Estridinge [] Cum non solum [per] litteras et rescripta subditorum nostrorum verum eciam popularem clamorem multipliciter obloquentem et vehemencius admirantem nobis constiterit evidencius [quod] Reginaldus filius Ricardi de Vescy Galfridus de Hothum Rogerus de Langetoft Radulphus Canun de North Cave Adam serviens Ricardi de Vescy Johannes le Gras de Feriby Walterus Scalle de eadem Robertus filius Petri de Swanlund Robertus Wytekake Rogerus clericus de Feriby et quidam alii de quorum nominibus nondum constat ecclesiam de Feriby ad quam magistrum Willelmum de Clyf ad presentacionem domine Agnetis de Vescy admisimus et rectorem instituimus in eadem cum arcubus et sagittis et multiplici vi armata de speciali precepto et auctoritate Ricardi de Vescy presbiteri violenter sunt ingressi ipsam cum armis defendentes bona et proventus ipsius ecclesie occupant rapiunt et consumunt in salutis proprie decrementum et libertatis ecclesiastice lesionem et ipsius rectoris derisionem non modicam et jacturam Et quia hujusmodi malefactores per statutum synodale excommunicacionis sentencia innodantur solempniter bis in anno tibi mandamus in virtute obediencie firmiter injungentes quatinus visis presentibus aliis negociis pretermissis assumptis tecum rectoribus circumjacencium ecclesiarum ad predictam ecclesiam de Feriby personaliter accedas et predictos malefactores moneas et inducas ut ab ecclesia ipsa et domibus ecclesie recedant et exeant sine mora et ea que occuparunt abstulerunt et rapuerunt ecclesie memorate restituant et rectori Et si monitis tuis non paruerint ipsum Ricardum de Vescy presbiterum et Reginaldum filium ejus et alios supradictos in specie et alios violentos malefactores in genere de quorum nominibus diligenter inquiras et tunc nominatim et in specie in singulis ecclesiis et capellis archidiaconatus Estridinge singulis diebus Dominicis et festivis pulsatis campanis candelis accensis publice et sollempniter excommunicas et excommunicari facias vice nostra Et quid inde feceris nobis tuis patentibus litteris harum seriem continentibus citra festum Sancti Bartholomei rescribere non postponas Datum apud Drax iiij idus Augusti pontificatus nostri anno primo