Charter Document - 07030303

Ad incrementum laudis unici et venerandi Dei filii et ad religionis nomen eminencius extollendum nos Willelmus dei gratia [] ij nonas Februarii Anno Domini MCCLXX nono ad monasterium de Kirkeham gracia visitacionis et inquisicionis accedentes quedam reformacione digna inter cetera opera Christo complacencia inquirendo comperimus que in Dei nomine Amen sic duximus corrigenda In primis precipimus sub obtestacione divini judicii quod laici et extranei in infirmariam non ingrediantur quoquo modo exceptis dumtaxat medicis et aliis qui infirmorum obsequiis deputantur Et quod prior vel subprior sepius vel saltim aliquociens in anno carolas canonicorum in claustro et alibi in monasterio faciat in sua presencia aperiri et res inclusas oculis subiciat ne per serrarum hujusmodi operiatur facultas seu occasio delinquendi Item inhibemus ne aliquis indumenta vel alia ex donacione cujusquam recipiat nisi [de] presidentis licencia speciali et tunc non ipsi recipienti set alii per presidentem discrete et provide liberetur Simplices siquidem et viles personas scurriles et vagos ab accessu refectorii firma prohibicione reicimus et arcemus Item volumus quod infirmi secundum facultates monasterii et qualitatem morbi honeste et curialiter procurentur Item prohibemus ne canonici deinceps ad infirmariam accedant ut se ibidem calefaciant et ut fieri consueverat imbibant cum talia pocius voluptatis existant quam religionis conveniant honestati per hoc tamen fratrum infirmorum seu debilium necessitatibus non intendimus derogare Item precipimus quod elemosina discrecius solito sit amodo indigentibus distributa ita quod stipendiarii domus eam ut actenus non consumant Item inhibemus ne cibaria extra refectorium quibuscumque specialibus contra regularem honestatem impostorum transmittantur Item injungimus priori in virtute et vinculo sue professionis quod excessus confratrum sepius corrigat et recenter et nequaquam sub dissimulacione eos pretereat consueta Et volumus quod porte ab accessu et alias inutilium domui et inhonestorum arcius solito custodiantur Et quod canonici et conversi secundum graduum suorum dignam exigenciam se ubique habeant et distinguant nec juniores majoribus se aliquatenus preponant Item injungimus quod condecens equalitas in quibuscumque necessariis secundum regulam communiter cuilibet observetur Item inhibemus ne servitores vel obsequiales loci filiis vel cognatis suis monasterium onerent vel molestent set eos ammoveant sine mora Interdicimus autem omnem altercacionem et strepitum in prosis et cantibus inchoandis Item inhibemus sub periculo consciencie cuiuslibet ne post completorium causa bibendi vel pretextu cujusquam indecentis lascivie hospites visitent piine vel amicos nec eos adeant nisi causam habeant necessariam vel utilem sic agendi et tunc de licencia presidentis eisdem omnimoda cum dictis hospitibus seu amicis potacione absente priore penitus interdicta Item volumus quod prior confessiones saltem semel in anno audiat singulorum Inhibemus insuper ne canonici loca monialium vel alias suspecta deinceps in improperium ordinis adeant inhoneste Correciones vero predecessoris nostri in omnibus que consonant regule volumus et precipimus observari Sanctam siquidem virtutum dilatacionem et progressum inibi ad coronam glorie et retribucionem eternitatis paterno affectu firmiter suademus ut per hec et alia Salvatori placencia possimus faciem Ipsius eternaliter intueri