Charter Document - 07030302

Ad honorem et laudem Altissimi et in nomine individue Trinitatis deifice Amen Nos Willelmus dei gratia Ebor archiepiscopus Anglie primas visitacionis et inquisicionis officium in monasterio de Bridelingtone tercio kalendas Februarii anno Domini MCCLXX nono solliciti exercentes pleraque corrigenda ibidem comperimus que ad cultum et incrementum divini obsequii necnon ad firmiorem observanciam regule et ritus ipsius ordinis et monasterii sic duximus reformanda In primis injungimus et precipimus sub attestacione divini judicii quod elemosina monasterii in usus illicitos contra Deum et regulam amodo nullatenus convertatur set fidelius et commodius solito per custodes ipsius amodo conservetur et debite distribuatur ad meritum tanti collegii et honorem ita quod nullus sine licencia superioris ad quem pertinet se de eadem mittenda vel minuenda aliquatenus intromittat Item precipimus quod nullus decetero absque causa infirmitatis racionabili in infirmariam se mittat nec confingat se ad Dei obsequium impotentem Quod si per priorem evidencius sit inventum secundum regulam et modum culpe protinus puniatur Caveat insuper prior ne aliquem confratrem decetero licenciet incedendi per patriam vel visitandi benivolos vel parentes nisi causa necessaria vel saltim utilis subsit pariter et honesta ita quod exitus licenciati in scandalum non cedat monasterii vel labem proprietatis aut aliquod vicium ca non inducat Item cistas suspectas inhibemus districcius cum ser ruris Precipimus eciam et injungimus quod statuta predecessoris nostri in hiis que regule et sanctorum patrum decretis non dissonant firmiter observentur quod prioris industrie moderamini et consciencie ad presens relinquimus coram Deo Provideat insuper idem prior quod dormitorium in lecturis et aliis necessariis sine more dispendio [reparatur] Item ne canonici in maneriis vel alibi in perniciem fame sue soli morentur et maxime apud Blouberhous ubi inhonesta multi multociens suspicantur Item precipimus quod divine laudis preconia districte fiant et nullatenus quod absit amodo sicut actenus sincopando Sub pena eciam anathematis volumus et precipimus quod si quis professorum quicquam sibi tamquam [proprium] applicarit illud suo priori in communes usus et disposicionem communem statim restituat et retrudet Priorem vero monemus et exhortamur in Domino ut viribus conventum suum personaliter dirigat et sequatur maturiorum consilia et non juvenum tantummodo in negociis requirendis et quod sine delectu et accepcione personarum proclamaciones faciat et emendas adeo quod immoderata mansuetudo vel pietas non sit sibi dampnabilis ante Deum Item honestum et industrium subpriorem sine dilacionis incommodo precipimus ordinari Caveant eciam canonici et fratres conversi monasterii ne leporariis [suos] seu equos habeant nec nutriant aliorum Item volumus et precipimus quod Odo frater Thome de Aunewycke in suffragio vel servicio granatarii ulterius circa hujusmodi officium non moretur nisi secus placuerit de conventu Provideat insuper prior quod officium sacra astarie deinceps quicquid actenus contigerit diligencius compleatur et quod inutiles et viles persone bona monasterii consumentes celeriter expellantur et quod nec obedienciarii nec alii pretextu vanitatis vel spectaculi causas evagandi non appetant ut per has et alias observancias regulares sint in eodem collegio votivi et placabiles ad meritum et salutem nostram Altissimo servitores