Charter Document - 07030184

Ob integritatem observancie regularis et ad suavitatem pacis et dulcedinis apud Novum burgum firmius nutriendam nos W[illelmus] [] xv kalendas Marcii anno Domini MCCLXX nono visitacionis officium ibidem exercuimus et comperta correximus in hunc modum In primis precipimus sub obtestacione divini judicii quod omnes de conventu obedient priori decetero honeste et humiliter obediant et intendant Et quod nullus se infirmum similet vel confingat nec in infirmariam admittatur aliquatenus sed pocius ut ficticius expellatur et puniatur insuper juxta culpam Precipimus eciam ne quis post completorium in claustrum exeat causa lascivie vel bibendi et si aliquis hospitem vel amicum tunc de licencia presidentis visitaverit ibidem non comedat neque bibat Volumus insuper quod prior assumpto sibi subpriore omnes cistas et corollas monasterii quater in anno visitet et scrutetur ne proprietatis tabes quemquam maculet contra Deum Item precipimus in virtute obediencie et sancte professionis facte ne obedienciarii vel receptores quicumque se deinceps difficiles exhibeant computandi sed singulis annis distincte in presencia seniorum compotus audiatur ita quod status monasterii in fine omnibus et singulis innotescat A vilibus vero personis refectonum precipimus modis omnibus utilius solito custodiri Elemosinam refectorii et eciam tocius monasterii in usus ipsius Dei vivi et pauperum distribui precipimus et non illicite interverti Volumus eciam quod si quis in laudibus seu obsequiis matutinis fraude ficticia vel alias negligens obmutescat protinus suspendatur et a consorcio per presidentem expellatur donec ad cor redierit conterendo Detracciones et materiam injurandi deinceps penitus inhibemus et ad statum integrum et antiquum priorem restituimus et coadjutoribus cessantibus et amotis ita quod idem prior consilium conventus et maxime discretorum diligat et sequatur et viriliter se habeat rebellibus et periculis resistendo Precipimus eciam quod tales officinis preficiantur et officiis qui complete servicium ecclesiasticum didicerint et quod discreti custodes bone fame et laudabilis vite conservacioni bonorum et grangiarum exterius deputentur Item precipimus quod obedienciarii dimittentes officia nichil sibi de prehabitis retineant vel usurpent sed integre restituant per optenta Item injungimus omnibus et singulis de conventu ut obsequium Dei tractatam celebrent et distincte et quod quelibet littera consignanda in plena congregacione conventus palam et puplice consignetur Item omnem inutilem familiam et dissipantes bona monasterii et superfluitatem canum firmiter inhibemus Item precipimus ne aliqua mulier [tanquam hospes] vel aliter receptetur nisi fuerit uxor honesta patroni que per unicam noctem tantummodo morari poterit in remote Item prohibemus ne quisquam munera vel dona recipiat aliquorum nisi consensu presidentis et licencia accidente et tunc non sibi remaneat sic acceptum sed per priorem seu presidentem communibus usibus deputetur Venaciones insuper canonicorum et discursus illicitos penitus inhibemus et precipimus quod porte et exitus monasterii melius solito custodiantur Item Willelmum de Foxholes Robertum Wrot Willelmum de Endreby et Anselmum de Pontefracto quorum mores et opera hactenus a regula discrepabant sancte Industrie et sollicite reformacioni prioris et subprioris sub periculo prelacionis et professionis sue committimus corrigendos ne decetero Deo displiceant sicut prius Datum in capitulo die et anno supradictis