Charter Document - 07030165
| Charter Number: | 07030165 |
|---|---|
| Cartulary Title: | The Register of William Wickwane, Lord Archbishop of York, 1279-1285 |
| Charter Language: | Latin |
| Charter Origin: | Religious |
| Charter Type(s): | Mandate |
| Date: | 1283 |
| Date type: | Assigned |
| Resource Link(s): |
Borthwick Institute - Register 3 (f173v) |
Charter:
Suo decano de Aynesty salutem [] Quoniam Celebris laudis preconio catholicarum ecclesiarum consecracio fuerit extollenda Dominici Templi dedicacio apud Vetus Testamentum indicat quod extitit litteraliter umbra hujusmodi Templum siquidem venerabantur antiqui patres in accensu altarum quod apud hanc lucentem ecclesiam in oblacionis munere hiis qui fidem vere sapiunt pretenditur in exemplum Si itaque tenebrarum temporibus sic templi altaria redolerent quam fervenciori honore exuberare debent hec super candelabrum fulgentes ecclesie in altari Vir fidelis quilibet procul dubio non hesitat set zelo devocionis estuat et exultat Ac ecce pro eo quod nonnullos degeneres filios habet mater ecclesia et protervos qui honorem matris negligunt dampnabiliter et se ipsos tanto sollicitus eos ad viam salutis revocare curamus et in ea studiosius confovere quanto vie illorum quibus Domino disponente perficimur a nobis periculosius requirentur Sane auribus nostris novimus inculcatum quod licet parochialis ecclesia de Biltone dedicacionis honore fulgeat insignita parochiani tamen ecclesie ejusdem dum an[n]iversarium dedicacionis hujusmodi annis imminet revolutis debitas oblaciones in tanta solemnitate inpendere renuunt quas dedicator eciam sicut decuit facere stabilivit Ea propter tibi firmiter injungendo mandamus quatinus moneas efficaciter et inducas parochianos predictos quod oblaciones suas quas reputamus debitas diebus dedicacionis prefate ecclesie faciant fideliter et exsolvant Ad quod eos si tuis monicionibus pertinaciter restiterint per censuram ecclesiasticam arceas et compellas nos super hujusmodi execucione mandati certificans per litteras tuas patentes que harum seriem representent Datum apud Cawode ij idus Augusti []