Charter Document - 07030122
| Charter Number: | 07030122 |
|---|---|
| Cartulary Title: | The Register of William Wickwane, Lord Archbishop of York, 1279-1285 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1279 |
| Date type: | Internal, Calendar, Papal |
| Resource Link(s): |
Borthwick Institute - Register 3 (f107v) |
Charter:
Venerabili in Christo patri [] Dei gracia archiepiscopo Eboracensi salutem frater Nicholaus domini pape penitenciarius in Domino Robertus de Berley laycus vestre dioecesis lator presencium nobis exposuit quod cum olim quidam clerici latrones et malefici cum aliis latronibus laycis in suis maleficiis deprehensi fuissent et capti ac pro de suis excessibus laicalis justicia condemnasset eos ad mortem idem Robertus tunc custos regius seu ballivus qui sua potencia et auctoritate regia illos quos clericos esse sciebat potuit eripere de manibus laicorum et vobis vel vestris officialibus tradere reservando vitam eisdem ecclesiastica libertate contempta et humanitatis gracia deposita conniventibus oculis pertransiens immo neci eorum consenciens decollari permisit eosdem propter quod predecessor vester tanquam prelatus providus et discretus ne tanta inmanitas pertransiret inulta et ne seculares judices qui frequenter in clericos conculcando libertatem ecclesie debaccantur factum tam execrabile assumerent in exemplum nisi animadvers[i]o debit a sequeretur ipsum Robertus tanquam reum homicidiorum hujusmodi et excommunicacione majori ligatum ad Sedem Apostolicam destinavit quare supplicavit humiliter sibi super hoc per Sedem eandem misericorditer provideri Nos igitur prefatum Robertus a reatu hujusmodi et excommunicacione quam ex hoc incurrit ac peccatis suis aliis ad vos auctoritate domini pape remittimus juxta formam ecclesie absolutum mandantes eidem sub debito prestiti sacramenti ut per omnes majores ecclesias loci in quo dicti clerici decollati fuerunt nudus et discalciatus braciis dumtaxat retentis virgas ferens in manibus si secure poterit incedat et ante fores ecclesiarum ipsarum a presbiteris earum psalmum penitencialem dicentibus se faciat verberari quando major in eis aderit populi multitudo suum publice confitendo reatum Ecclesiis autem quarum ministri erant clerici memorati satisfaciat competenter Et si aliquid feudum ab ipsis habuit ecclesiis vel jus patronatus in eisdem optinuit ipse et ejus heres illis perpetuo sint privati Vos autem considerata culpa ipsius injungatis ei penitenciam que sibi sit ad salutem et aliis ad terrorem Quod si predictam [penitenciam] facere contempserit ipsum in pristinam sentenciam reducatis Datum Roma apud Sanctum Petrum iiij idus Novembris pontificatus domini Nicholai pape iij anno secundo