Charter Document - 07030049
| Charter Number: | 07030049 |
|---|---|
| Cartulary Title: | The Register of William Wickwane, Lord Archbishop of York, 1279-1285 |
| Charter Language: | Latin |
| Charter Origin: | Religious |
| Charter Type(s): | Mandate |
| Date: | 1281 |
| Date type: | Internal, Calendar, Episcopal |
| Resource Link(s): |
Borthwick Institute - Register 3 (f5r) |
Charter:
Suo decano Beverlacensi salutem Si Johannes de Grouuale clericus Petrus de Setone Ricardus de Brynistone Robertus de Trescke clericus Ricardus Sesse Willelmus Cissor Thomas le Russ et Johannes le Russ frater ejus primo gradu penitencium constituti nudis pedibus in sola tunica absque cingulo fena et capucio singuli cum singulis cereis competentibus in manibus accensis hac instanti die Dominica in crastino Omnium Sanctorum in facie ecclesie Beati Johannis de Beverlaco contrite se obtulerint ad peragendam puplicam penitenciam quam eis injunximus pro commissis eos pacienter suscipias ad eandem ita videlicet quod ibi iter suum humiliter iniciantes statim versus Eboracum per villas de Burtone Wythtone Haytone et sic usque ad Pontem Belli dirigere preparent gressus suos quos penitentes in forma quam premisimus usque ad fines jurisdiccionis tue videlicet usque ad Burtone personaliter prosequaris Rogerum vero de Bernistone et Petrum de Catefosse presbiteros eiusdem gradus quibus in reverenciam ordinis compatimur pio motu in capis clausis vel nigris superpelliciis cum stolis indutos et cum virgis disciplinalibus in manibus predictos penitentes usque ad ecclesiam Beati Nicholai exponendo causam in itinere ob quam penitentes sic incedunt insequi volumus et mandamus et ibi occurret eis decanus noster Eboracensis et perducet eos ad majorem ecclesiam et que ulterius incumbunt plenius consummabit qui premuniatur de hora veniendi ut eos preveniat tempestive Ceterum quia ad partes divertimus in proximo remotas committimus tibi potestatem ut quotquot primi gradus una cum predictis vice hac penitere voluerint admittere valeas vice nostra quod die Omnium Sanctorum solempniter publices et proclames proviso quod de hiis qui in secundo gradu sunt vel tercio te nullatenus intromittas Nomina quidem penitencium sub sigillo tuo inclusa decano nostro Christianitatis Eboracensis per predictos presbiteros transmittas a quo certificari poteris an omnes penitenciam compleverint in tuis litteris comprehensi et aliquem famulum deputare procures qui sequatur eos in via et videat an debite peniteant et incedant senes si qui fuerint et debiles ab hujusmodi penitencia repellas penitus in presenti ne periculum de eis contingeret quod nollemus Margoriam de Driffeud nostro arbitrio reservamus supersedeas igitur nichil attemptans contra eam donec aliud receperis in mandatis Datum apud Cawod iij kalendas Novembri pontificatus nostri anno tertio