Charter Document - 07023909

In nomine Patris et Filii et Spiritus Sancti Amen Nos W[alterus] [] volumus ordinamus et disponimus quod dictus prior habeat et recipiat per manus receptoris nostri [vel successoris nostri] Ebor singulis annis quoad vixerit nomine sustentationis perpetue in festis Pentecostes et Beati Martini de bonis prioratus de Boulton xx libras sterlingorum et quod dictus conventus per fidelem nuncium sive attornatum eas ibidem receptori nostro [vel successoris nostri] faciat [ad opus] ipsius prioris memoratis terminis liberari [nisi de terminis et loco secus convenerint inter ipsos] Volumus etiam et ordinamus quod idem prior domos dicti prioratus apud Rythre cum suis commoditatibus et consuetis pertinentiis absque alienatione destructione venditione vel injusta deterioratione rei vel gravamine nativorum vel libere tenentium [si qui fuerint] usibus suis applicet et retineat pro congruo receptaculo sua vita ita tamen quod si apud Deum nos vel monasterium de Boulton in gratitudinis vitio vel aliter quocumque modo notabiliter demeruerit vel excedat ipsum premissis absque strepitu judiciali privare possimus pro nostre libito voluntatis Ne etiam prioratui supradicto hec nostra assignatio ipsius receptaculi gravis videatur vel molesta volumus et ordinamus quod si priorem de Boulton quicumque fuerit pro assisis [comitatibus] sinodis vel aliis de causis apud domos predictas de Rythre hospitandi gratia contigerit declinare idem Ricardus quondam prior de Boulton ipsum ad curiales commoditates et cooperimenta domorum honorifice recipiat et honeste et quod sex equos ipsius prioris tunc in feno et litera ipsius loci faciat singulis vicibus exhibere Volumus etiam quod nisi uterque prior ibidem tunc simul possint comode et utiliter commorari forte propter diutinam moram novi prioris [et magne sue familie] vetus prior alibi in honesto loco interim se receptet insuper quod per visum celerarii vel etiam ipsius quem prior et conventus [super]visorem constituerint merentum domibus et carrucis necessarium ac buscam prout [et quotiens] opus est sine destructione notabili aliquo loco propinquo et de prope recipiat [idem Ricardus] de boscis prioratus supradicti Volumus etiam et ordinamus quod si [sub]prior celerarius canonicus aliquis conversus vel quivis procurator domus [de Boulton] ad predictum locum declinaverint tunc domus antedicte de Boulton sumptibus [excepto feno et litera] ibidem et non aliter hospitentur Volumus etiam de vasis et utensilibus [bobus aliisque instauras] de dicta domo de Boulton sibi gratiose et liberaliter commodandus [et tradendis] post decessum vel qualemcumque perpetuum recessum ipsius [utpote si ad aliam dignitatem vocatus fuerit vel ad aliquem locum religionis se transtulerit] integre domui de Boulton una cum ceteris bonis de eodem loco [de Rithre] provenientibus [vel extra] que in vita sua [excepto commodato predicto] non distribuerit vel expenderit totaliter reserventur Volumus insuper quod de cetero inter eundem Ricardum et canonicos de Boulton quevis murmurationes detractiones vel scandala penitus conquiescant et quod cordiali et caritativo honore ad merita et mutua obsequia [utpote consilia auxilia et nuncia] cum opus fuerit se recolligant bono zelo ita quod ad expensas domus de Boulton dictus Ricardus cum opus fuerit in nunciis et consiliis industrias subeat et labores De consensu etiam partium earumdem reservamus nobis [et successores nostris] plenam potestatem [interpretandi que dubia fuerint et similiter] procedendi secundum quod nobis placuerit contra partem ipsam que presentem ordinationem non curaverit observare Datum apud Otteley [sub sigillis partium et nostro alternatim huic cyrographato scripto appositis] die et anno supradictis