Charter Document - 07022715

Nos W[illelmus] de Sancto Oswaldo et R[adulphus] de Gyseburne priores et ordinis Sancti Augustini in Ebor provincia visitatores ad monasterium de Novo loco in Schirewode ejusdem ordinis ac provincie causa visitationis in eo faciendas xvij kalendas Augusti MCCLX primo accedentes ut juxta statuta Laterinensis Concilii secundum Deum et canonici discipline regulas que in prefato monasterio essent corrigenda ad statum debitum revocaremus quedam que subscripta sunt corrigenda censuimus videlicet quod in infirmaria ad ministerium et solatium infirmorum serviens et honestus et fidelis una [cum] garcione sub ipso ponatur qui obsequium gratum et debitum infirmantibus exhibere sufficiat Ac insuper alicui canonicorum ejusdem monasterii a suo priore injungatur ut secundum regulam Beati Augustini infirmorum curam gerens eisdem horas canonicas dicat et divina coram eis celebret Talia etiam cibaria infirmantibus provideantur quibuslibet juxta infirmitatum qualitates uti comodius poterunt Ad hec etiam providimus quod alicui canonicorum fideli et diligenti de consilio fratrum officium camerarie injungatur qui de communi recepta monasterii certam pecunie summam recipiat scilicet xij libras sterlingorum de quibus vestimenta et calciamenta tam priori quam canonicis et conversis omnibus secundum quod cuiquam opus esse prospexerit sufficienter inveniat ita ut juxta regulam nostram nullus sibi aliquid operetur Insuper et equitatura pro necessariis emendis ad nundinas cum oportunum fuerit ab ipso priore eidem camerario provideatur Serviens etiam prudens et fidelis de communi monasterii quo ad victualia et stipendia exhibendus et in predicto monasterio continuo moraturus eidem substituatur qui predicto officio necessaria noverit utiliter procurare et procurata debito modo et honesto reparare [] Hec omnia prefati monasterii priori et conventui in virtute obedientia qua Sedi Apostolicis et Capitulo Generali predicte provincia tenentur inviolabiliter et integre servanda injunximus priori autem memorato firmiter precipiendo mandantes ut secum ad Capitulum Generale dominum Ricardum de Walkringham vel aliquem discretum ex senioribus ducere non omittat per quem de mandato conventus speciali nobis plenius constare possit si premissa omnia secundum provisionem nostram servata fuerint Ut autem hec omnia robur et firmitatem optineant et ad predicti monasterii relevationem ad totius ejusdem conventus notitiam facilius perveniant prelibata universa inscripto redacta et quater in anno coram conventu publice recitanda sigillorum nostrorum appositionibus munita prefatis canonicis reli[n]quimus