Charter Document - 07021723

Coram vobis reverendo patre domino Ebor archiepiscopo Anglie primate excipiendo contra mandatum regium vobis super ecclesia de Warsop pro Willelmo Birl clerico nuper directum propono ego Henricus de Retford clericus procurator magistri Willelmi de Lessington legitimus quod cum dominus Johannes de Lessington dudum verus dominus ac juris et facti possessor totius villa de Warsop cum omnibus suis juribus et pertinentiis quibus jus patronatus ejusdem ecclesie annexum est ad cujus presentationem dominus Ricardus de Sutton ultimus rector ipsius ecclesie de Warsop ad eandem ecclesiam per predecessorem vestrum admissus et institutus fuerat in fata decessit dominus Willelmus de Sutton eidem domino Johanni in universum jus hereditarium ejusdem ville legitime succedens ac hereditati ipsius ut heres se immiscens plenam possessionem totius hereditatis sue in eadem villa cum omnibus suis juribus et pertinentiis proprio herede gerendo nactus est et habuit Cumque postmodum eodem domino Willelmo sublato de medio dominus Robertus de Sutton filius et heres suus tunc miles et major annis similiter in universum jus hereditatis paterno legitime succedens et ipsius hereditatis possessionem cum suis juribus et pertinentiis statim naturaliter apprehendens predictum dominum meum magistrum Willelmum de Lessington ad ecclesiam ipsam de Warsop per mortem dicti domini Ricardi rectoris ipsius tunc vacantem reverende paternitati vestre postea presentasset vos ex officii vestri debito legitima inquisitione in forma debita secundum articulos consuetos sollempniter precedente et in hiis omnibus pro domino meo et ipsius patrono sufficienter in omnibus faciente ipsum dominum meum auctoritate pontificali admisistis justitia exigente et in corporalem ac pacificam possessionem ipsius ecclesie induci fecistis ante omnem questionem motam seu presentationem vel oppositionem eidem domino meo vel patrono suo super hoc a domino rege vel aliquo alio factam seu comminatam Propter que dico quod cum dictus dominus meus ad eandem ecclesiam presentatus ab eo qui bona fide et etiam ex causa legitima jus patronatus ejusdem ecclesie possidebat auctoritate vestra legitime dudum admissus sit et plena possessione ejusdem ecclesie jam per longum tempus gavisus fuerit vos ad executionem regii mandati supradicti etsi legitime jus patronatus ejusdem ecclesie nunc ut dicitur evicerit in prejudicium domini mei et magis in enervationem ecclesiastice libertatis procedere de jure non potestis nec debetis presertim cum mandatum domini regis de admissione domini mei ad ecclesiam predictam et de possessione sua pacifica nullam mentionem fecerit propter quod apparet quod per suppressionem veritatis principe circumvento obtentum sit quod si fuisset expressum de jure nequaquam fuisset impetratum Et quia exempla presentia cavere nos premonent in futurum ne vos pater reverende vel alius auctoritate vestra vel alterius predictum Willelmum de Birl vel alium ad ecclesiam de Warsop in prejudicium juris et possessionis domini mei admittatis vel admittat vel ad executionem dicti mandati regii quomodo libet procedatis vel procedat vel aliquid aliud contra dominum meum super ipsa ecclesia faciatis vel faciat Sedem Apostolicam in scriptis appello et Apostolos peto ecclesiam predictam dominum meum omnes suos et sua protectioni ejusdem Sedis specialiter ex nunc supponendo et appellationes quas prius hac occasione interponi feci nihilominus rati fico et in novo et prosequi intendo protestans quod dominum meum vel procuratorem suum ad probandum omnia premissa artare non intendo set quod ad victoriam sibi proficiat id ad probandum sibi sufficiat Protestor insuper quod si dictus Willielmus vel alius contra dominum meum predictum super eadem ecclesia coram vobis in forma juris experiri voluerit servato ordine paratus erit semper se legitime defendere Actum coram nobis Walterus Archiepiscopus apud Sutburton iuxta Beverl viij idus Aprili anno gratie MCCLX nono In cujus rei testimonium presentibus sigillum nostrum fecimus apponi