Charter Document - 07021570

In nomine Domini Amen Cum notorium ac manifestum existat et per partes Anglie publice divulgatum quod venerabilis pater in Cristo dominus W[alterus] miseratione divina archiepiscopus Ebor Anglie primas et predecessores sui a tempore cujus memoria non existit consueverunt facere ante se per totam Angliam quocumque ierint in absentia Apostolice Sedis Legati utentis insigniis Apostolice dignitatis sancte crucis Dominica deferri vexillum propter quod felicis recordationis Alexander tertius quondam sacrosancte Romane Sedis antistes inhibitionem archiepiscopo Ebor super delatione crucis sue ad petitionem Cantuariensis archiepiscopi olim factam statuit et decrevit dicto archiepiscopo Ebor suisque successores nullum penitus super hiis prejudicium allaturam sicut in epistola decretali plane noscitur contineri Insuper cum in libris scripturis ac gestis sanctorum patrum quorum memoria est in laude in veteribus etiam solemnibus instrumentis residentibus in archivis publicis in formam autenticam reperiatur redactum quod electi Doborensis et Cantuariensis ecclesie olim ab archiepiscopis Ebor munus confirmationis et consecrationis beneficium receperunt cumque per inhibitionem predictam ac relaxationem ipsius et insinuationem Romano Pontifici et per eum partibus olim factam ad Sacrosanctam Sedem Apostolicam super delatione crucis predicte questio fuerit devoluta per quam quidem curiam provide est statutum nichil penitus super hoc esse novandum donec per diffinitivam sententiam decernatur an Ebor ecclesia de jure debeat hoc habere sitque cautum in jure quod quatuor patriarche ante se Dominice crucis vexillum faciant ubique deferri nisi in Urbe Romana et in presentia Summi Pontificis ac Legatorum ejus utentium insigniis Apostolice dignitatis et per hoc sine juris injuria contigere valeat duorum pariter concurrere insignia vexillorum Que omnia et alia sufficientia dante Deo ad conservationem juris et possessionis Ebor ecclesie et predicti domini W[alterus] ac successorum ipsius ego Edwardi de Welle clericus predicti Ebor archiepiscopi procurator nomine procuratorio in presentia venerandi patris domini B[onifatius] Dei gratia archiepiscopi Cantuariensis suique officialis coram publico auctoritate Sedis Apostolice notario et testibus ad id rogatis protestor me pro loco et tempore propositurum et legitime probaturum Idcirco in Dei nomine Amen Ne dominus archiepiscopus Cantuariensis aut officialis ipsius aut alius auctoritate sua vel suffraganeorum suorum aut conservatores sui vel judices seu alii auctoritate eorum in dictum dominum archiepiscopum Ebor aut ejus ecclesiam seu eorum eisque adherentium familias res personas possessiones vel loca occasione delationis crucis predicte presertim cum in eos nulla illis existat ordinaria vel delegata jurisdictio attributa sententiam excommunicationis suspensionis depositionis interdicti vel aliam citra Apostolice Sedis judicium quod invoco in hac parte in dicti archiepiscopi Ebor aut alterius permittentis deferri taliter crucem suam non vocati non convicti non confessi prejudicium promulgare presumat vel aliud attemptare indebite contra eos sacrosanctam Sedem Apostolicam et tuitionem Ebor curie in hiis scriptis provoco et appello et peto Apostolos michi dari predictumque dominum meum eique adherentes ac eorum ecclesias res personas possessiones et loca protectioni Omnipotentis Dei ac Beatorum Petri et Pauli Apostolorum ejus necnon tuitioni dicte curie specialiter supponendo