Charter Document - 07020911
| Charter Number: | 07020911 |
|---|---|
| Cartulary Title: | The Register of Walter Giffard, Lord Archbishop of York 1266-1279 |
| Charter Language: | Latin |
| Charter Origin: | Religious |
| Charter Type(s): | Election |
| Date: | 1276 |
| Date type: | Internal, A.D., Calendar |
| Resource Link(s): |
Borthwick Institute - Register 2 (f138v) |
Charter:
Reverendo patri in Cristo et domino karissimo W[alterus] dei gratia Ebor Archiepiscopis Anglie primas sue paternitatis filii devoti canonici Falleye salutem cum omni subjectione reverentia et obedientia Vacante prioratu nostro per depositionem domini Radulphi de Plesleye per vos coram vobis vj Julii in capitulo nostro factam a venerabili paternitate vestra licentia ibidem optenta cedendi vestra gratia et alium nobis in priorem eligendi nos omnes et singuli post missam Beate Virginis solempniter celebratam intravimus capitulum nostrum v idus Julii Anno Domini MCCLXX sexto pro futuro priore nobis canonice eligendo et invocata ibidem Spiritus Sancti gratia cum decantatione hymni Veni Creator Spiritus tractavimus de modorum forma eligendi Tandem decrevimus secundum formam scrutinii auxiliante Domino fore procedendum Unde unanimi omnium nostrum assensu et voluntate Deum habentes per oculis secundum predictam scrutinii formam de gremio conventus nostri concorditer nobis elegimus dominum Thomam de Wathenowe concanonicum nostrum in priorem nostrum nobis perficiendum Qua quidem electione sollempniter coram nobis publicata nullo canonicorum nostrorum reclamante sed [omnibus] assensum suum electioni prebentibus dictus electus electioni de se facte assensum suum in hunc modum prebuit dicendo Et ego in nomine Sancte Trinitatis et gloriose Virginis et omnium Sanctorum assentio Quo facto duximus eum cum decantatione Te Deum laudamus et campanarum pulsatione ante majus altare quem ibidem prostratum et orantem post orationem ut moris est factam ad osculandum idem altare deduximus Hec igitur venerande paternitati vestre significando duximus et supplicamus ut electo nostro gratiam confirmationis vestre impendendo sine more dispendio si placet quod vestrum est ulterius exequi dignemini In cujus rei testimonium sancte paternitati vestre has nostras litteras sigillo nostro communi signatas fecimus patentes Datum apud Falleye v idus Julii Anno Domini MCCLXX sexto Valeat pia vestra paternitas in Cristo