Charter Document - 07020899
| Charter Number: | 07020899 |
|---|---|
| Cartulary Title: | The Register of Walter Giffard, Lord Archbishop of York 1266-1279 |
| Charter Language: | Latin |
| Charter Origin: | Religious |
| Charter Type(s): | Excommunication |
| Date: | 1276 |
| Date type: | Internal, A.D., Calendar |
| Resource Link(s): |
Borthwick Institute - Register 2 (f131v) |
Charter:
Suo officiali salutem gratam et benedictionem Ex crebra fama et facti evidentia recepimus et dolemus quod Robertus de Balliolo parochianus noster quem visceraliter nuper dileximus sicud nostrum spiritu invidie et perversitatis accensus libertates et jura ecclesie nostre Eboracensis et nostra nefariis et quasi continuis ausibus turbat amputat et infringit nobis et nomini nostro ac fame nostre in offensionem Dei et ecclesie nostre necnon et scandalum plebis evidentissime notorie et puplice crudeliter a tergo et mendaciter detrahendo in ruinam et detrimentum libertatum nostrarum non sine excommunicationis periculo devotos et benivolos nostros execrabili et Deo odibili excitatione in persecutores et nocentes nostros quatenus sufficit commovendo Licet igitur hec conscientiam nostram sen personam nostram sicut placet Altissimo non onerent vel offendant tamen ecclesia nostra morsibus malignis hujusmodi acriter sauciatur Unde devotioni vestre in virtute obedientie nunciamus et injungimus per presentes quatinus per totam dioecesim nostram et maxime apud Beverlacum et alibi insuper ubi deget ipsum moneri publice faciatis quod citra Dominicam in medio Quadragesime se ecclesie nostre Eboracensi necnon et presentie vestre super premissis excessibus zelo satisfactionis et proposito prompto parendi humiliter representet utpote qui in majoris excommunicationis sententiam secundum constitutiones nostras sinodales tanquam sue salutis immemor est prolapsus Alioquin dicta die sub protervitate transacta vos ipsum faciatis auctoritate Dei ac constitutionum sinodalium et nostra a consortio Cristi et ecclesie [et] communione plebis Catholice per vos et officiales suffraganeorum nostrorum ac alios per totam provinciam nostram excommunicatum puplice nunciari et ab omnibus artius evitari ut nunquam suffragium a coepiscopis et confratribus nostris Cantuariensis provincie ad id etiam [ei concedatur] exactissimis vigiliis implorando sic in singulis eventibus procedentes ut correctio ipsius in hac parte ceteris incutiat metum malignantibus et horrorem Valeatis Datum apud Aukland nonas Februarii anno gratie MCCLXX quinto