Charter Document - 07020748
| Charter Number: | 07020748 |
|---|---|
| Cartulary Title: | The Register of Walter Giffard, Lord Archbishop of York 1266-1279 |
| Charter Language: | Latin |
| Charter Origin: | Religious |
| Charter Type(s): | Decree |
| Date: | 1266 - 1279 |
| Date type: | Assigned |
| Resource Link(s): |
Borthwick Institute - Register 2 (f106r) |
Charter:
Quia statuta canonica ex professionis nostre virtute tenere debemus et exequi ne nobis inobedientie vitium possit impingi vel in cura nobis commissa si subditos quosque viderimus oberrare mereamur de negligentia reprehendi decet et expedit ut si qua pretextu favoris vel gratie secularis hactenus sint omissa ea supplere summo opere studeamus resumptisque viribus ad revocandum perperam attemptata sine personarum delectu mentem nostram instantius applicemus Cum igitur plerique dioecesis nostre clerici cupiditatis ardore succensi fame sue seculari non curantes consulere vel saluti nec animarum suarum periculum cecutientibus sue rationis oculis attendentes dum insufficientiam suam non dijudicant vel eque ponderant in statera plurium parochiarum curam cum vix ad unius sufficiant ad ignominiam nostri qui per dissimulationis perniciem tanti videmur criminis non expertes recipere et tenere sine dispensatione Sedis Apostolice non formidant animas procul dubio quas curare non possunt miserabiliter defraudando bonaque non sua immo potius Crucifixi nequiter occupando necnon et super gregem Dominicum sibi commissum cui pastores forsitan licite fore possent vigilare detrectant ne penam quam jus novum et vetus infligit hominisque machinatio comminatur cum probris et dispendiis incurramus vobis mandamus firmiter injungentes quatinus omnes rectores ecclesiarum et vicarios nostre dioecesis plura habentes beneficia de quorum dispensationibus plene vobis non constat quod sibi possint et debeant de jure sufficere per locorum archidiaconos vel decanos citari peremptorie sine more dispendio faciatis quod coram nobis vel vices nostras gerenti in majori ecclesia Ebor tali die dispensationes suas si quas habeant exhibituri vel ulterius inde facturi quod dictaverit ordo juris necnon et responsuri et satisfacturi secundum sanctiones canonicas de perceptis in ecclesiis quas minus canonice ipsos apparuerit occupasse proviso quod nulli penitus in hac parte parcatur et quod dicti archidiaconi vel decani nos super citationibus hujusmodi rite factis quot etiam et qua ac in qua vel in quibus dioecesibus sic beneficiati beneficia sua optinent reddant ad dictos diem et locum litteratorie certiores