Charter Document - 07020736

W[alterus] Dei gratia [] executor collectionis decime illustri regi Anglie ab Apostolica Sede concessi venerabili in Cristo patri domino Cantuariensi archiepiscopo et omnibus abbatibus prioribus religiosis monialibus obedientiariis rectoribus vicariis prelatis et omnibus beneficiatis in Cantuariensi dioecesi constitutis salutem in Domino Cum reverentissimus pater dominus Ottobonus Sancti Adriani diaconus cardinalis nuper in Anglie Apostolice Sedis legatus negotium collectionis decime predicte nobis per suas litteras quas vobis inspiciendas mittimus duxerit committendum nos volentes affectu precipuo in executione mandati hujusmodi sic procedi ut mandatum Apostolicum debitum sortiatur effectum et aliqua ecclesia in exhibenda de suis proventibus decima ultra suarum facultatum exigentiam non gravetur duximus taliter ordinandum ut cujuslibet monasterii vel ecclesie seu persone ecclesiastice redditus per bonos viros antequam predicta decima colligatur fideli taxatione prehibita inquirantur De circumspectione igitur dilectorum in Cristo magistri Bonetti de Sancto Quintino illustris regis Anglie clerici et Walteri de Lond monachi Sancti Petri de Westmonasterio plenaria confidentes eosdem ad Cantuariensem civitatem et dioecesim deputamus destinandos ad inquirendum verum valorem omnium redituum fructuum et proventuum tam spiritualium quam temporalium episcopatus Cantuariensis et omnium ecclesiarum ejusdem civitatis et dioecesis tam cathedralium quam aliarum necnon et monasteriorum etiam exemptorum aliorumque locorum ecclesiasticorum regularium et secularium quarumlibet personarum cujus cumque ordinis seu dignitatis existant et maneriorum ad quascumque personas ecclesiasticas spectantium tum per juramenta illorum quorum sunt redditus tum per alios viros ydoneos et fideles juratos et ad audiendum ratiocinia decime de duobus annis proximo preteritis ab omnibus videlicet quantum et quibus solverint utroque anno et ad colligendum decimam presentis anni eidem regi debitam et ad petendum et recipiendum arreragia duorum annorum precedentium ab eisdem qui secundum verum valorem suorum beneficiorum decimam plenaria non solverint hiis dumtaxat exceptis qui in littera papali excipiuntur Quocirca universitati vestra firmiter injungendo mandamus sub pena excommunicationis quam in contradictores et rebelles seu mandatum nostrum super hoc negligentes et non obedientes et in illos qui predictum valorem sciverint et requisiti veritatem fraudulenter seu malitiose celare presumpserint et etiam in omnes illos qui predictam decimam secundum verum valorem suorum beneficiorum non solverint vel minus plene solverint ex nunc generaliter proferimus in scriptis quatinus ad diem vel dies locum et loca quos [vel] que dicti Bonetti et Walteri vobis duxerint assignandas per vos vel per procuratores ydoneos habentes ad id a vobis speciale mandatum coram ipsis comparere curetis et subditos vestros prout ab eisdem requisiti fueritis venire faciatis certificatur eosdem per juramenta vestra seu procuratorum suorum super hoc fideliter prestanda de nominibus monasteriorum prioratuum domorum religiosorum et ecclesiarum predicte civitatis et dioecesis vicariorum et omnium dignitatum et beneficiorum et maneriorum redituum pensionum fructuum et proventuum et de annuo valore omnium premissorum ad vos vel ecclesias vestras abbatias monasteria dignitates domos ballivas officia personatus rectoris et vicarias spectantibus quoquo modo et reddituri eisdem rationem decima de duobus annis proximo preteritis et probaturi coram ipsis quantum et quibus solveritis et satisfacturi eisdem de decima presentis anni secundum verum valorem beneficiorum vestrorum et de arreragiis precedentium duorum annorum illi videlicet qui secundum verum valorem suorum beneficiorum decimam integre non solverunt pro certo tenentes quod si de fraude malitia seu contumacia aliquorum nobis constiterit in premissis ad alias penas spirituales et temporales contra ipsos graviter procedemus Datum London die Jovis proxima ante festum Sancti Martini hiemale Anno Domini MCCLX octavo