Charter Document - 07020706

Nos Walterus dei gratia Ebor Archiepiscopo Anglie primas ad prioratum Sancti Oswaldi Glovernie causa visitationis Anno Domini MCCL[XVII] die Sanctorum Innocentium accedentes ejusdem loci priori et canonicis salvis hiis que in eorum regula continentur subscripta statuta indiximus observanda ea que in aliis nostris visitationibus ipsis injunximus renovantes superaddentes quedam nova qua animarum suarum saluti et ejusdem domus proficuo vidimus expedire In primis quod prior qui pro tempore fuerit majora negotia domus cum consilio nostro si in partibus illis presentes fuerimus vel illius quem ad hoc deputaverimus si absentes fuerimus et consilio majoris et sanioris partis sui conventus faciat Quod in refectorio cum fratribus comedat et in dormitorio jaceat nisi infirmitate vel alia justa causa fuerit prepeditus Quod si ex aliqua causa necessaria contigerit eum extra refectorum comedere vel extra dormitorium jacere unum canonicum honestum secum habeat et ultra horam canonicam cum hospitibus moram non faciat Quod assiduus sit ad capitulum collationem et di[s]ciplinam nisi causa rationabilis impedierit Quod excessus fratrum in capitulo cum consilio seniorum sui conventus caritative corrigat omni hodio et rancore postpositis Quod affabilem se exhibeat fratribus cum super aliquo conveniatur et ipsos non afficiat conviciis vel opprobriis coram secularibus nec etiam aliquem gravi pena ligare presumat nisi de assensu conventus Quod nullus admittatur canonicus vel conversus nisi assensu nostro prius requisito et optento et tunc obedientiam faciat priori professionem autem nobis Quod celerarius curam agat de exterioribus sub priore tam in grangiis quam reditibus et proventibus animalium et aliarum rerum ad domum pertinentium audiatque compotum a fratribus et servientibus exterioribus respondeatque bursariis communiter electis Qui etiam bursarii cum omnibus aliis obedientiariis temporibus statutis ad minus bis in anno de omnibus receptis et expensis coram priore et saniori parte capituli fideliter computabunt Quod subcel[er]arius in dormitorio jaceat negociisque domus per actis claves celarii ibidem secum deferat Quod sigillum conventus custodiatur a tribus vel iiij communiter electis et quod nulle littere sigillantur de eodem nisi presente priore et majori et saniori parte conventus Quod nulla fiat alienatio vel permutatio nec etiam instrumentum aliquod conficiatur super alienatione vel permutatione facienda nisi de speciali auctoritate et licencia nostras quod si secus actum fuerit irritum habeatur et inane Quod beneficia sacrista arie vel aliis officinis domus legata vel concessa non subtrahantur nec in alios usus convertantur Quod canonici tam intra quam extra presint conversis et conversi nullam habeant super canonicos dominationem Vestes autem laneas habeant conversi ejusdem coloris cujus et canonici exceptis capis easque de re vestiario recipiant In loco autem competenter assignato eis reficiantur et ad matutinas cum canonicis surgant et prout regula exigit ibidem commorentur Fratres autem conversi in grangiis commorantes carnibus non utantur nisi coram priore vel in presentia alicujus canonici Particulares vel privatas comessationes in cameris nulli faciant quia sicut unus est locus questionis et dormitionis ita unus debet esse locus refectionis Quod canonici ad fena levanda vel alia opera rusticana exercenda non exeant Quod nullus proprietatem habeat nec etiam depositum nisi de licentia prioris Quod claustrum a transitu secularium diligenter custodiatur et quod hostia ecclesie et claustri per custodes ordinis prudenter et sollicite custodiantur ne quis horis incompetentibus intra vel extra possit evagari unde scandalum possit oriri Quod infirmi honeste tractentur et de bonis domus secundum ejus facultates prout necessitas exegerit sustententur Inhibemus eciam districte et firmiter injungendo ne corrodis vendant vel stipendia assignent aliqua clericis vel laicis aut etiam gratis concedant inperpetuum vel ad tempus sine nostro assensu Quod mulieres in grangiis ubi fratres commorantur de noctibus non morentur et si necessitas exegerit tales ibi famulentur de quibus non possit oriri sinistra suspicio De decanatu sic ordinamus quod cura et custodia ipsius decanatus per nos parochiali capellano dictorum canonicorum vel alii secundum arbitrium nostrum committantur et si alii quam capellano eorum cura ipsa commissa fuerit corrodium unius canonici de eadem domo integre percipiat Ad hec pro reprimendis potationibus superfluis et comesationibus inhonestis precipimus ut nec prior nec canonici in suis grangiis de cetero faciant braciane set ad eas cum pro domus utilitate accesserint de prioratu necessaria secum ferant in eisdem quas habent in valle Glovernie ultra unam noctem simul nullatenus moraturi nec etiam apud Cumpton vel Eston moram faciant longiorem nisi urgens domus necessitas et evidens utilitas id exposcat Prior vero alicubi profecturus pro negotiis domus sue unum maturum canonicum secum habeat et unicum armigerum caute cavens ne domus sua inutili familia vel suorum vel concanonicorum parentum accessibus oneretur vel aliquibus debitis de cetero a[g]gravetur Hec autem statuta in initio cujuslibet mensis in capitulo precipimus recitari statuentes ut neglector eorundem si prior sit vel obedientiariis et convictus quod ea non servaverit ab officio suo cadat si vero simplex canonicus eorundem sit transgressor secundum arbitrium nostrum vel ejus qui eis consiliarius a nobis fuerit deputatus gravi subjaceat ultioni In hujus ordinationis perpetuo durature majorem stabilitatem nos presenti scripto apposuimus signum nostrum