Charter Document - 07020674

Venerabilibus fratribus [] archiepiscopo Ebor [] episcopis ac dilectis filiis abbatibus prioribus decanis archidiaconis prepositis et aliis ecclesiarum prelatis per Ebor provinciam constitutis salutem et apostolicam benedictionem Salvator noster in cujus ditione cuncta sunt posita civitatem Jerusalem videns et previdens ruit uram flevisse describitur super eam Et nos itaque qui civitatem veri David religionis videlicet christiane circa cujus regimen non insufficientie nostre debilitatis sicut nec debemus innitimur sed de sola superabundantis virtutis divine speramus non solum scissuras juxta prophetie vaticinium multiplicatas aperte videmus sed et ruine magne periculum in subtractione populi Grecorum qui a sedis apostolice obedientia se subtraxit in occupatione maxima et vastatione valida Terre Sancte in subversione morum que universaliter in clero graviter obrepsisse videtur et populo jam non tam cernimus quam palpamus non possumus non lugere non comprimere lacrymas continere suspiria vel cohibere singultus Profecto cum tanta subsit plangendi ratio planctum declinare non possumus sed necesse est jam foras exeat ab olim dum etiam nos minor status haberet tanto altius radicatus introrsum tantoque diuturnitate factus acerbior quanto facultate vetante diutius non est efficaciter exire permissus Exeat igitur exeat ad fratres et filios ut scientes incommodum ipsum prudentius estimantes cooperationis remedio efficacius pro viribus relevent et planctum pie compassionis officio dulcius consolentur Quis ergo dabit capiti nostro aquam aut oculis nostris fontem lacrymarum ut sic populi humilitati nostre commissi spiritualiter et temporaliter interfectos diebus et noctibus lugeamus quod culparum sordes quibus iram meruisse creditur diluamus Lugendum siquidem occurrit quod per subtractionem predictam a sedis apostolice unitate subtractos et in devio positos grandis culpe mors afficit quod sanctum universalis corpus Ecclesie membro tam nobili eadem gravis admodum et dispendiosa subtractio tanto tempore mutilavit Lugendum et iterum ac amare dolendum quod sicut in partibus transmarinis non tantum audivimus sed et oculis nostris vidimus et manus nostre contrectaverunt pro dolor detestabilius solito blasphematur in gentibus nomen Christi cum jam non tam verbis quam rebus ipsis et factis Christianis insultetur ab infidelibus et dicatur Ubi est Deus eorum funiculus hereditatis Domini eadem Terra Sancta per nefandissimos Saracenos sic audacter invaditur sic secura occupatur audacia sic vastatur intrepide sic in eisdem partibus Christianus populus inhumaniter trucidatur quasi non sit illis adjutor nec sit qui miserere possit ipsorum Lugendum et amplius pariter et horrendum quod cum ille paterfamilias diligens qui horis diei variis operarios suam misit in vineam ille summus agricola sator bonorum omnium et plantator agrum mundi hujus diligenter excolens in eo seminaverit semen bonum si inimicus homo tanta invenitur in ipso super seminasse viliorum zizania et errorum ut ea deflere magis liceat quam narrare idemque ager cotidie potius crescere videatur ad ignem quam albescere inveniatur ad messem Hec dum ministeria considerationis debite mentis nostre presentantur obtutibus ignis in nostris meditationibus exardescit et ad tanta discrimina relevanda suspirat affectus zelus accenditur et spiritus anxiatur Ad quod cum nos sufficere non posse sciamus levamus oculos nostros ad montem montem quidem Dei montem uberem montem pinguem unde opportunum nobis provenire auxilium et humiliter petimus et devote speramus Et quia salubre in hiis adhiberi remedium interest generaliter omnium nos cum fratribus nostris aliisque viris prudentibus exacto et frequenti tractatu prehabito prout lante necessitatis instantia exigebat de ipsorum consilio generale concilium sicut imitatione digna sanctorum Patrum consuetudo laudabilis longeve observationis exemplo nos instruit opportuno tempore decrevimus congregandum ut in eo tam circa premissa quam circa cetera que salutem respiciunt animarum illa Deo auspice communi consilio inveniatur provisio et ejusdem approbatione concilii roboretur per cujus salutiferam executionem virtus Altissimi eliminatis erroribus roborata fide reductis errantibus redintegrata ejusdem fidei unitate sedatis discordiis pace firmata exstirpatis vitiis correctis excessibus moribus reformatis repressis oppressionibus libertate solitis munimentis instructa recuperatis deperditis et ejusdem Terre Sancte statu prospero reparato hujusmodi scissuras uniat ruinas impleat occupata restituat vastata restauret restituta et restaurata conservet nobisque viam operiat idem ipse qui novit et facultatem tribuat ipse qui potest ut vitiorum errorumque zizaniis ad comburendum in fasciculos alligatis ad triticum in ejus horreum congregandum sic in premissis juxta intensum animi nostri desiderium sibi ministrare possimus utiliter quod idem verus ejusdem universalis sponsus Ecclesie ipsam dilectam suam expeditam rugis purgatam maculis munitam virtutum monilibus ac ornatam unam semper habeat et formosam ad sui nominis laudem et gloriam ad animarum profectum robur fidei pacem et exaltationem populi Christiani Quia vero prosecutio tanti propositi tempore indiget ut deductum maturius ac felicius auctore Domino effectum debitum sortiatur biennium numerandum ab initio instantis maii ad id duximus deputandum de putaturi preterea interim aliquos viros tanto ministerio competentes ad predicandum in Terre prefate suffragium salutiferum verbum crucis per quod corda principum prelatorum ceterorumque fidelium inducantur ad subsidium eidem terre prout ipsius exposcit extrema necessitas impendendum Quocirca universitati vestre per apostolica scripta precipiendo mandamus quatenus omni negligentia relegata cunctis prout talis et tanti negotii qualitas exigit dispositis et paratis sic medio tempore vos accingatis ad iter quod kalendis maii anui ab incarnatione Domini millesimi ducentesimi septuagesimi quarti quas vobis et aliis pro termino assignamus in loco quem licet ad presens sub taceamus ex competenti tamen tempore vobis curabimus intimare nostro vos conspectui presentetis ad subventionem necessariam terre predicte sollers et operosum interim studium impensuri prosequendo favorabiliter et fideliter adjuvando illos quos ad hujusmodi prosequendum negotium duxerimus deputandos Volumus autem quod in vestra provincia ex vobis fratres episcopi unus vel duo remaneant ad ea que officium episcopale requirunt inibi exercenda et tam ille vel illi quos propter ea contigerit remanere quam alii quos ad idem venire concilium prepeditio forsan canonica prohibebit capitula insuper ecclesiarum omnium ejusdem provincie tam cathedralium quam etiam aliarum quibus per vos fratres archiepiscopi et prefati episcopi ex parte nostra volumus id mandari cum in eodem concilio tractanda sint aliqua que pertinebunt ad ipsos ad idem concilium viros ydoneos pro se mittant non obstantibus quibuscumque privilegiis seu indulgentiis quibuscumque personis ordini vel dignitati seu collegio sub quacumque verborum forma vel expressione a predicta sede concessis per que possit effectus hujusmodi mandati nostri quomodo libet impediri aut eidem in aliquo derogari circa personarum et evectionum numerum moderamine quod alias statuit Lateranense concilium taliter observato ut nemini liceat illud excedere sed omnibus prout libet arctare Nullus pomposus aut inanis glorie quesitor sed quilibet sic vere humilitatis cultor appareat quod et ecclesie sibi commisse nequaquam onerosus existat Interim quoque per vos et alios prudentes viros Deum timentes et habentes per oculis omnia que correctionis et reformationis limam exposcunt inquirentes subtiliter et conscribentes fideliter eadem ad ipsius concilii notitiam deferatis Et nos nihilominus variis modis et viis sollers studium et efficacem operam dare proponimus ut omnia et alia in examen ejusdem deducta concilii correctionem et directionem recipiant opportunam Nullus igitur inobedientie notam et canonice ultionis acrimoniam vitare desiderans fallacium excusationum velamento se muniat vel ex impedimentis itinerum que Domino prava in directa et in vias planas sua omnipotentia convertente aspera cessaverunt frivole allegationis munimenta confingat uta tam sancti prosecutione operis se subducat sed occurrant singuli voluntarii ad id quod et divine congruit voluntati et salutem animarum ac utilitatem respicit singulorum Datum Laterani ii kalendas Aprilis pontificatus nostri anno primo