Charter Document - 07020666
| Charter Number: | 07020666 |
|---|---|
| Cartulary Title: | The Register of Walter Giffard, Lord Archbishop of York 1266-1279 |
| Charter Language: | Latin |
| Charter Origin: | Religious |
| Charter Type(s): | Acceptance |
| Date: | 1266 - 1279 |
| Date type: | Assigned |
| Resource Link(s): |
Borthwick Institute - Register 2 (f86r) |
Charter:
W[alterus] [] dilectis in Cristo filiis priori et conventui de Fellee salutem [] Miserabilis et deploranda conquestio ex parte R[adulfus] Barri confratris vestri delata nobis nostra commovit viscera et ad hoc efficaciter nos induxit ut de ipsius salute solliciti perditionem ejus vobis de cetero imputemus nisi salutem ipsius fraterna caritate cum exactissima diligentia procuretis Verum est nec infitiari potest quod in ecclesia vestra religionis habitum sumens vinculum professionis emisit set tandem a stabilitate quam promiserat dampna[bi]li resiliens levitate de celo ad terram de claustri honestate antiquo hoste instigante revolavit ad seculum peccatis multiplicibus involutus Ceterum misericordiam quam regularis observantie institutor ad ternarium coartavit evangelice mansuetudo gratie septuagesimis septies ampliavit adeo ut errantem ovem ut redeat non expectat quin potius ex abundanti misericordia ut in dulcedinis sue benedictionibus preveniat eam jubet querere ac salutaribus monitis ab errore et invio ad vite semitam revocare Sane ad laboris compendium vobis cedit quod regredi nititur quod ad januam pulsat quod devote et humiliter misericordiam postulat quod suum confitetur reatum quod omni satisfactioni secundum regularem observantiam votivus se submittit et judicium disciplinalis obedientie a misericordia non excludit ideoque vobis mandamus quatinus si de commissis ut dictum est devota parientia satisfacturum se offerat secundum observantiam regularem ipsum admittatis comiter conciti et tractare fraterna caritate studeatis nec precludatur ei sinus misericordie ne desperet cum majus gaudium sit angelis super uno peccatore penitentiam agente quam qui non indigent penitentia super nonaginta novem justis attendentes quod misericordiam et non sacrificium affectat clementia Salvatoris nec peccatoris mortem desiderat set potius ut convertatur et vivat Memores igitur misericordie quam pro filio revertenti prodigo pater evangelicus legitur impendisse regressum confratris vestri salva ordinis disciplina gratanter admittatis in visceribus caritatis