Charter Document - 07020606

In nomine Domini nostri Jesu Cristi Amen Cum Johannes de Skelton clericus asserens ecclesiam de Fiskelake Eboracensis dioecesis per mortem Johannis quem quondam rectorem ejusdem fuisse confixit vacantem esse quodque fructus ejusdem summam decem librarum secundum communem estimationem patrie non excedebant annuatim ecclesiam ipsam auctoritate Sedis Apostolice dudum sibi conferri procurasset certis sibi super hoc executoribus deputatis qui occasione hujusmodi discretum virum Gerardum de Grandissono capellanum domini pape rectorem ejusdem multipliciter inquietarent Tandem dominus pape nobis Walterus [] negotium ipsum sub ea forma per suas duxit litteras committendum ut facta super hoc per nos vel per alios de plano et sine strepitu judiciali inquisitione diligenti si invenerimus quod dicta ecclesia per mortem dicti Johannis non vacaret aut quod estimatio ejusdem predictam decem librarum summam excedat eidem Johanni perpetuum silentium imponere debeamus super ea Verum quoniam per inquisitionem quam per discretos viros custodem monasterii de Hanepol et decanum de Pontefracto quibus vices nostras commisimus in hac parte fieri fecimus qui partibus ad presentiam suam certis die et loco evocatis in penam contumacie ipsius Johannis qui per se nec per procuratorem comparere curavit coram eis processerunt ad eandem comperimus quod dicta ecclesia per mortem dicti Johannis ab olim non vacavit utpote quam dictus Gerardum per sex decem annos et amplius pacifice tenuit et quiete per bone memorie W[illelmus] predecessorem nostrum rector canonice institutus in eadem cujus etiam quidam Jocerandus nomine proximus fuerat rector ante ipsum Quodque estimatio ejusdem ecclesie predictam decem librarum summam excedit utpote qua ad quadraginta marcas est communiter estimata sicut etiam in registro nostro antiquo vidimus manifeste contineri In nomine Domini Absentia dicti Johannis quem ad presentiam nostram citatum jam per triduum expectavimus Dei presentia suppleta meritis inquisitionis predicte et negotii circumstantiis undique diligenter examinatis diffinitive sententiando et sententialiter diffiniendo dicto Johanni super dicta ecclesia de Fiskelake perpetuum silentium imponimus et dictum Gerardum quem in eadem rectorem canonice institutum invenimus ab ipsius Johannis impetitione sententialiter et diffinitive absolvimus Ipsum etiam Johanni predicto Gerardum in quinquaginta marcis taxatione nostra prehibita et ab ipsius procuratore juramento recepto expensarum nomine condemnamus [] die sabbati proxima post festum Sancti Mathei anno domini MCCLX octavo