Charter Document - 07020548
| Charter Number: | 07020548 |
|---|---|
| Cartulary Title: | The Register of Walter Giffard, Lord Archbishop of York 1266-1279 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1268 |
| Date type: | Internal, Calendar, Episcopal |
| Resource Link(s): |
Borthwick Institute - Register 2 (f57v) |
Charter:
W[alterus] miseratione [] dilectis in Cristo filiis magistris Symon et Thoma de Richem et de Notingham archidiaconis salutem [] Cum super immoderata exactione arreragiorum procurationum domini legati de anno primo et secundo sue legationis facta per officialem archidiaconi Cliveland et Bonifacium clericum ejusdem ad colligendum predicta arreragia per nostram dioecesim deputatos tota dioecesis ipsa si procederent enormiter gravaretur et quidam rectores pro utilitate communi totius cleri dicte dioecesis pro relevandis gravaminibus hujusmodi de auctoritate domini legati cum camerario ejusdem in summam ducentarum marcarum pro eisdem arreragiis convenerint et se mercatoribus obligarent nos illud tanquam utiliter gestum acceptantes vobis firmiter injungendo mandamus in virtute obedientie districte precipientes quatinus universos quos negotium contingit cujuscumque fuerint ordinis vel dignitatis ad contribuendum pro portione ipsos contingente collectoribus ad hoc per vos deputandis per sequestrationem beneficiorum et suspensionis interdicti et excommunicationis sententias vos vel alter vestrum quociens oportuerit per vos vel alios compellatis Nos autem sententias quas vos vel alter vestrum ob hoc rite tuleritis in rebelles ratas habebimus et acceptas et eas usque ad satisfactionem condignam faciemus firmiter observari Proviso quod collecta ipsa quam per visum decanorum nostrorum fieri volumus non excedat summam predictam et quod decanis ipsis de perceptis singulis in suis decanatibus innotescat ut nobis per ipsos si oportuerit fieri possit super hoc postmodum plena fides Datum London iij kalendas Maii pontificatus nostri anno secundo