Charter Document - 07020380
| Charter Number: | 07020380 |
|---|---|
| Cartulary Title: | The Register of Walter Giffard, Lord Archbishop of York 1266-1279 |
| Charter Language: | Latin |
| Charter Origin: | Religious |
| Charter Type(s): | Order |
| Date: | 1267 |
| Date type: | Internal, A.D., Calendar |
| Resource Link(s): |
Borthwick Institute - Register 2 (f46r) |
Charter:
W[alterus] permissione [] discretis et religiosis viris abbati et conventui monasterii de Oseneya juxta Oxoniam salutem et sinceram in Domino caritatem Querelam magistri Alani dicti Sine lana presbiteri recepimus continentem quod cum felicis recordationis Urbanus Papa quartus sibi apud Oxoniam theologice facultatis studiis perseveranter insistere cupienti cum alias non habeat unde possit sustentari de bonis monasterii vestri necnon et uni servienti ejus in vite necessariis quamdiu vixerit per litteras apostolicas sub certa forma mandaverit provideri archiepiscopo Ebor sub expresso nomine dignitatis sic super hoc executore deputato prout in litteris ipsis quas in nostra presentia exhibuit constitutus vidimus manifestius contineri bone memorie G[erardus] predecessor noster tunc archiepiscopus Ebor receptis hujusmodi litteris per discretum virum archidiaconum Oxon cui sub certa forma commiserat super hoc vices suas dicto presbitero de hujusmodi necessariis de bonis monasterii vestri fecit provideri vosque de mandato ipsius archidiaconi ad provisionem hujusmodi ipsum admittentes vite necessaria aliquamdiu sibi pie et pacifice fecistis ministrari set postea mutata in contrarium voluntate et penitentes ut videtur vos pie egisse necessaria hujusmodi sibi prout asserit contra justitiam subtraxistis pro vestre libito voluntatis non attendentes quod turpius eicitur quam non admittitur hospes Quare nobis humiliter supplicavit ut providere sibi super hoc commissa nobis in hac parte jurisdictione seu auctoritate curaremus Nos igitur quantum sine juris offensa hoc facere possumus rigorem temperare et religioni vestre parcere cupientes discretionem vestram rogamus monemur et hortamur in Domino auctoritate nihilominus apostolica vobis firmiter injungendo mandantes quatinus pie attendentes inter opera karitatis non modicum esse errantem ab erroris sui semita revocare et dictum presbiterum hactenus fame sue prodigum ad frugem vite reducere melioris eidem ob Dei et Apostolice Sedis reverentiam de subtractis ut predictum est necessariis satisfacere et pro futuro tempore sicut tenemini providere studeatis ne idem presbiter quem senectus deprimit in cleri et presbiteralis ordinis scandalum ad vanitates et scurrilia secularia que hactenus impudenter est secutus et que derelinquendi purum prout asserit habet affectum per inopiam tanquam canis ad vomitum redire compellatur Scituri quod si secus feceritis eidem deesse non intendimus quin ad executionem contra vos procedamus quantum de jure possumus et debemus Datum apud Wauton vi idus octobre anno gratie MCCLX septimo