Charter Document - 07020355
| Charter Number: | 07020355 |
|---|---|
| Cartulary Title: | The Register of Walter Giffard, Lord Archbishop of York 1266-1279 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1251 |
| Date type: | Internal, Calendar, Papal |
| Resource Link(s): |
Borthwick Institute - Register 2 (f42r) |
Charter:
Innocentius episcopus servus servorum Dei venerabilibus fratribus archiepiscopis episcopis per regnum Anglie constitutis salutem et apostolicam benedictionem Cum harum rector Sathanas tenebrarum se frequenter in lucis angelum transfigurans sequaces innumeros per erroris devia post se trahat ecclesie gubernaculum tenentibus expedire plurimum arbitramur ut discretione provida qua velut diluculi palpebre debent assidue precedere gressus suos singulorum spiritus noverint comprobare ne ipsis dormientibus sub ovina pelle lupi lateant in ovili et in agro ecclesie lolium germinet pro frumento Sane sicut accepimus a viris fide dignis quedam muliercula interius onerata peccatis foris tamen sanctitatis cujus virtutem prorsus abnegant speciem pretendentes disruptis vinculis obedientie salutaris et vite latitudine que ducit ad mortem absque jugo discipline dampnabiliter evagantur circueundo varias regiones nec hiis contente ad dampnationis sue cumulum quo liberius suam valeant malitiam palliare sub nomine ordinis Sancti Damiani cujis digne memorie sanctus confessor Cristi Franciscus primus cultor extitit et plantator se velle monasteria ejusdem ordinis construere profitentes super ipsorum fundatione litteras a nobis impetrant tacita veritate unde frequenter accidit ut per tales nomen Sororum Minorum quod nec ipsis Sororibus ordinis Sancti Damiani ex regula seu vite formula competit sibi fallaciter usurpantes infamie nubilo dilectorum filiorum Fratrum Minorum Ordinis puritas offuscetur Cum igitur talium non indigeat Deus mendacio nec de suo dolo et fraude comodum debeant reportare ne memoratum ordinem quem sincere diligimus et gaudemus utiliter promoveri fame sue contingat decetero pro talibus incurrere detrimentum universitati vestre per apostolica scripta mandamus quatinus sub nomine ordinis Sancti Damiani Occasione quarumcumque litterarum directarum seu dirigendarum a Sede Apostolica que de presentibus expressam non fecerint mentionem in vestris civitatibus seu dioecesibus monasterium seu habitaculum inchoari seu inchoatum construi nullatenus permittatis nisi de dilecti filii ministri provincialis Fratrum Minorum in Anglie fidet consilio pariter et assensu Quod si contra nostrum mandatum quicquam contigerit attemptari easdem curetis hujusmodi auctoritate nostra sublato cujuslibet appellationis obstaculo cohercere Data Lugduni xvj kalendas Sept pontificatus nostri anno octavo