Charter Document - 07020320
| Charter Number: | 07020320 |
|---|---|
| Cartulary Title: | The Register of Walter Giffard, Lord Archbishop of York 1266-1279 |
| Charter Language: | Latin |
| Charter Origin: | Religious |
| Charter Type(s): | Request |
| Date: | 1268 |
| Date type: | Assigned |
| Resource Link(s): |
Borthwick Institute - Register 2 (f39r) |
Charter:
Viris venerabilibus et discretis ac amicis suis karissimis dominis decano et capitulo Lincoln W[alterus] permissione [] salutem Vestris libenter semper vellemus obtemperare rogatibus et mandatis in quibuscumque specialibus nedum in hiis que jus commune deposcit si via fuerit ordinata et nostre dignitatis prejudicium non pateret Unde cum in ecclesia de Scarle cadat institutio facienda ad quam oportet sicut nostis de jure communi per quedam preambula utpote per presentationem cujus interest per inquisitionem sequentem et per instantiam presentati venire dilectionem vestram requirimus cum affectu quatinus non feratis moleste quod institutionem dicti Willelmus de Hemmingeburg in ecclesia supradicta distulimus dictis articulis et duobus maxime pretermissis Scituri quod in prebendis Wellensis Ecclesie dum ei prefuerimus modum ipsum quo ad prebendas extra dioecesim constitutas servavimus et venerabilis frater dominus Sarum quo ad prebendam Sarum in Wellensi dioecesi idem fecit Placeat igitur vobis et venerabili fratri episcopo vestro quod vestrum est facere et quod ad nos pertinet sine difficultate qualibet faciemus postea hilariter et libenter