Charter Document - 07020145
| Charter Number: | 07020145 |
|---|---|
| Cartulary Title: | The Register of Walter Giffard, Lord Archbishop of York 1266-1279 |
| Charter Language: | Latin |
| Charter Origin: | Religious |
| Charter Type(s): | Complaint |
| Date: | 1266 - 1279 |
| Date type: | Assigned |
| Resource Link(s): |
Borthwick Institute - Register 2 (f19v) |
Charter:
Reverendo domino et patri in Cristo W[alterus] Dei gratia Ebor archiepiscopo Anglie primati suus filius devotus W[illelmus] cancellarius Ebor ecclesie salutem cum omni subjectione debita filiali Ut animo vestro intentio scribentis adhereat et sinuentur ipsius verba cum suo pondere ne sumpta leviter inutili volatu pertranseant aut fastidium forsitan generent graviter intellecta Qui populo Dei regendo divina providentia ordinantur actus suos debent tanta maturitate pensare tanta circumspectionis districtione dirigere ut nichil inveniatur in eis quod oculos divine majestatis offendat aut inter fideles nimium scandali valeat suscitare Videat igitur vestra paternitas reverenda quid divina numina quid humane laudis preconia ex hoc valeant digne fari quod redditum perpetuum de synodalibus nomine cancellarie Ebor ecclesie cujus jura et libertates totis viribus defendere tenemini michi debitum et a predecessoribus vestris ab antiquo benigne solutum temporibus Vestris unius termini solutione tantummodo subducta penitus subtraxistis immo salva reverentia vestra eandem cancellariam ipso redditu spoliastis Quod si sic sub dissimulatione transiret michi in prejudicium et dicte cancellarie non modicam cederet lesionem hinc est quod multiplicatis jam per quinquennium precum instantiis preces accumulo supplicans humiliter et devote quatinus prefatum redditum dudum subtractum restitui ac deinceps sine difficultate vestra dominatio solvi precipiat cum effectu sic me si placet ad pristinum officium revocantes quem habetis et per Dei gratiam instantius habebitis in reverentia vobis exhibenda precipuum in devotione fidelem in serviendi voluntate sollicitum et ad cuncta beneplacita semper paratum Quid autem super premissis vestra paternitas duxerit faciendum michi vestro si placet per latorem presentium plenius innotescat Valeat paternitas vestra per tempora longiora