Charter Document - 07020144

Gregorius Episcopus servus servorum Dei venerabilibus fratribus universis archiepiscopis et episcopis ac dilectis filiis abbatibus prioribus prepositis decanis archidiaconis et aliarum ecclesiarum prelatis per regnum Anglie constitutis salutem et Apostolicam benedictionem Attendite fratres et filii attentis auribus et devotis mentibus verba patris Tangat veritatis spiritus corda vestra et ea sui luminis illuminans claritate patenter ostendat quid dictat ratio quid debitum gratitudinis exigit ad quod vos maxime consideratio singularis invitat ut hiis in discussionis debite introductis examen facile nostris beneplacitis assensus promptitudine concurratis Scitis siquidem quod gravibus ab olim set precipue hiis diebus subjecta peris immensis pressuris obpressa exinanita incolis enata viribus evacuata opibus ope deserta et necessarie destituta defensionis auxilio Terra Sancta fatali prorsus exposita discrimini videbatur set Ille in cujus conspectu non est durum in multis liberare vel paucis ad liberationem Terre illius ne in manus inimicorum inciderit prout miserabilis status ejus quem personaliter vidimus verisimiliter minabatur sibi ministrum pro sua voluntate elegitis dilectum videlicet filium nobilem virum Edwardum karissimi in Cristo filii nostri illustris regis Anglie primogenitum qui Ejus ut creditur Spiritu inspiratus post dissolutum sicut permisit Dominus congregatum pro dicte Terre subsidio exercitum in preterito immo constanti et forti animo serviendi personaliter illi Terre onus devote suscipiens maris discriminibus sua magnanimitate contemptis set virtute Domini superatis nec vitatis grandibus expensarum oneribus set exinaniens se ac sua ad Terram eandem tanquam devotionis filius transfretavit ibique non parcens sumptibus nec labores evitans unacum dilecto filio nobili viro Edmundo germano suo qui periculorum sumptuum particeps et laborum exstitit et existit ejusdem Terre ante ipsorum adjumentum quasi omnino in desperationem posite contra persequentium insidias et conatus sic necessarie admodum defensioni vacavit quia Omnipotentis brachium in eorundem nobilium manibus ipsius Terre salutem dirigens ipsam per eorum precipue ac ipsis assidentium ministerium sua virtute protexit Quod pro facto ad totius comodum Christianitatis cessisse dinoscitur et gloriam non modicam gentis vestre eja itaque qui participatis in gloria participare studeatis in merito ut et tandem premii participium habeatis Pensate prudenter nostri beneficia Redemptoris et quid dictat ratio que ad antidota naturaliter obligat beneficii perceptorem per consequens advertetis nec vos latebit quid exigat gratitudinis debitum cum ingratos in gratitudinis vitium perceptorum beneficiorum privatione condemnet Ad cujus tam grandis privationis incommoda evitanda exsurgite promptius in auxilium cause Cristi communicate sibi que recepistis ab ipso tenetis et defenditis per eundem predictorum nobilium ipsius bella gerentium onera subportate Ad quod vos considerationis specialitas non solum invitat ut premittitur set evidenti potius persuasione compellit Si enim debita meditatione revolvitis quantis progenitores ipsorum ecclesias vestras libertatum privilegiis muniverunt quanta liberalitatum largitione dotarunt nunc quam tanti beneficii largitores in predictis nobilibus sanguinis et memorie continuatione viventes in tante necessitatis articulo neglegetis nunquam ejus partem ipsis negabitis quod eis cum testatoris et heredis persona eadem censeatur et utriusque factum idem juris existimatione putetur integrum recepistis presertim cum eos habituri sitis provide propitios et promptiores vestrorum jurium defensores Ideoque universitatem vestram monemus et obsecramus in Domino Jesu Cristo affectuose rogantes quatinus predictis et aliis que patenter suggerunt hujusmodi negotii circumstantie manifeste diligenti examinatione pensatis memoratis nobilibus tantis fatigatis laboribus tam grandibus gravatis expensis compassionis debite officium exhibentes ipsis illius subventionis tantorum sumptuum et contractorum propterea debitorum ac dispendiorum supervenientium oneribus congruentis de vestris reditibus subsidium liberaliter concedatis que suppletione vel adjectione non egeat nec coactionem exigat per quam meritum liberalitatis amittat sed se potius meritoriam apud Deum et a nobis prosequendam gratiarum actionibus et favoris augmento cunctisque audientibus exhibeat commendandam In predictis autem dilectis filiis Magistris Raymundo de Nogeriis capellano nostro et Petro de Ausona canonico ecclesie Beati Martini Turonensis vel eorum alteri quem ad vos pervenire continget quosque ad hoc specialiter destinamus in hiis que nobis ex parte vestra retulerint indubitanter credere volumus ipsorumque persuasionibus adquiescere ac monitis obedire Data apud Urbem Veterem iij nonas Septembris pontificatus nostri anno primo