Charter Document - 07011839

Willelmus [] dilecto filio domino Johanni de Vallibus ballivo nostro de Hextildesham salutem gratiam et benedictionem Intelleximus a nonnullis quod orta dudum discordia inter bone memorie dominum Walterum Eboracensem archiepiscopum predecessorem nostrum ex una parte ac magistrum et Fratres hospitalis Sancti Egidii de Kipier ex altera super quadam pastura que vocatur South Redeleme que jacet per infra scriptas divisas videlicet a capite rivuli de Ewelhop Wispe versus aquilonem usque caput rivuli de Redelemeburn et ita quicquid continetur inter duos predictos rivulos usque Ywencrosse tandem post diutinas altercationes eadem discordia sub hac forma amicabiliter conquievit videlicet quod predicti Magister et Fratres hospitalis predicti tenerent de prefato predecessore nostro et ecclesia nostra Eboracensi dictam pasturam pro xl solidos sterlingorum sibi et suis successoribus annuatim reddendis Quo circa certis de causis tibi mandamus firmiter injungentes quatenus quam cito commode poteris per probos et legales homines de vicinia de limitibus et divisis dicte pasture diligentem facias inquisitionem et an aliquid de solo nostro ultra veros limites per dictos Magistrum et Fratres fuerit hactenus occupatum et si sic illud ad jus et statum pristinum absque more dispendio reducatur Inquirens nihilominus diligenter an foret ad damnum et prejudicium nostrum seu ecclesie nostre Eboracensis si nos concessionem et ordinationem quoad dictam pasturam sic factam nostre confirmationis munimine roboremus et si prejudicium nobis ex hoc fieret sive damnum inquiratur qualiter in quantum et ex quibus causis ac de aliis circumstantiis que nos movere poterunt ad confirmationem hujusmodi que a nobis petitur concedendam prout expedire viderimus vel etiam denegandam Et quid per inquisitionem hujusmodi inveneris nobis opportuno tempore constare facias distincte per tuas clausas literas tuo et illorum per quos eadem inquisitio facta fuerit sigillis signatas que harum seriem representent Vale Dat apud Cawod xvij die mensis Augusti anno Domini millesimo trescentesimo quinto decimo et pontificatus nostri anno decimo