Charter Document - 07011636

Quoniam propter diversas consuetudines in petendo decimam propter diversas causas inter rectores ecclesiarum et parochianos suos rixe et contentiones scandala et odia permaxima oriuntur volumus quod in cunctis ecclesiis parochialibus per archiepiscopatum nostrum constitutis uniformis sit petitio decimarum et proventuum ecclesiasticorum In primis volumus quod decime de frugibus non deductis expensis integre et sine aliqua diminutione solvantur et etiam de fructibus arborum et seminibus omnibus et herbis hortorum nisi parochiani competentem pro talibus decimis velint facere redemptionem Volumus etiam quod decime de fenis ubicumque crescant sive in magnis pratis sive in parvis sive in hortis exigantur et prout expedit ecclesie persolvantur De nutrimentis autem animalium volumus si de agnis quod pro sex agnis et infra sex oboli dentur pro decima septimus agnus et supra semper detur pro decima ita tamen quod rector ecclesie qui septimum agnum receperit det parochiano suo a quo decimam illam receperit tres obolos in recompensationem Qui octavum agnum receperit det denarium parochiano Qui nonum agnum receperit det obolum parochiano vel expectet rector ecclesie ad alterum annum donec possit decimum agnum habere si maluerit et qui ita expectaverit semper exigat secundum meliorem agnum vel tertium ad minus de agnis secundi anni et hoc pro exspectatione primi anni Et ita intelligendum est de decima lane quod si oves alibi in hyeme et alibi in estate nutriuntur decima est dividenda similiter si quis in medio tempore emerit vel vendiderit oves et certum sit de qua parochia ille venerunt dividenda est sicut de re que sequitur domicilia si autem incertum fuerit habeat illa ecclesia decimam infra cujus limites tempore tonsionis oves inveniuntur De lacte volumus quod decime solvantur dum durat videlicet de caseo tempore suo et de lacte in autumno et hyeme nisi parochiani competentem velint pro decimis talibus facere redemptionem et hoc ad valorem decime et commodum ecclesie De proventibus autem molendinorum volumus quod decime exigantur et solvantur ad valorem proventuum et hoc nisi domini pro valore proventuum faciant redemptionem De pasturis autem et pascuis tam communibus quam non communibus statuimus quod decime fideliter persolvantur et hoc per numerum animalium et dierum si expedit ecclesie De piscationibus autem et apibus sicut de omnibus aliis bonis juste acquisitis que renovantur per annum statuimus quod decime exigantur sed debito modo Statuimus etiam quod decime personales solvantur de artificibus de mercatoribus et de lucro negotiationis similiter de carpentariis fabris textoribus apud oratoribus et omnibus aliis stipendiariis operariis videlicet quod dent decimas de stipendiis suis nisi ipsi stipendiarii aliquod certum velint dare ad opus vel ad lumen ecclesie si rectori placuerit In petitione autem principalis legati volumus quod consuetudo provincie cum possessione ecclesie observetur ita tamen quod rector ecclesie in petitione sua sive fuerit vicarius sive capellanus annuus habeat Deum per oculis Sed quoniam multi inveniuntur decimas dare nolentes statuimus quod parochiani admoneantur primo secundo et tertio ut decimas Deo et ecclesie fideliter solvant quod si se non emendaverint primo ab ingressu ecclesie suspendantur et sic demum ad solutionem decimarum per censuram ecclesiasticam si necesse fuerit compellantur Si tamen dicte suspensionis relaxationem vel absolutionem petierint ad ordinarium locorum mittantur absolvendi et debito modo puniendi Rectores autem ecclesiarum seu vicarii seu capellani annui qui predictas decimas predicto modo seu propter formidinem hominum seu favorem Dei timore postposito cum effectu non petierint pena suspensionis innodentur donec dimidiam marcam argenti pro sua inobedientia archidiacono persolverint