Charter Document - 07010844

Omnibus Christi fidelibus Walterus Dei gratia Eboracensis archiepiscopus Anglie primas salutem in Domino Noveritis quod ad monasterium de Seleby anno gratie MCCXXXIIJ kal Aprilis causa visitationis accessimus et cognito statu ejusdem monasterii tam ex debito pastoralis officii quam ex auctoritate mandati Apostolici ita observandum esse decrevimus In primis videlicet ut abbas circa observationem ordinis et regularis discipline curam et sollicitudinem summam adhibeat Item quod abbas per consilium quatuor peritiorum de domo per ipsum et conventum electorum negotia domus juxta regulam beati Benedicti discrete ordinet et disponat Item quod idem abbas dictorum quatuor fratrum suorum consilio duos faciat celerarios unum interius et alium exterius qui discrete et honeste secundum formam Regule sub abbate exteriora negotia domus procuret Item quod abbas eorundem quatuor consilio duos bursarios faciat qui omnem pecuniam monasterium contingentem recipiant ad nutum abbatis et aliorum curam domus gerentium in communem utilitatem domus expendendam Qui quidem bursarii quater in anno videlicet in Nativitate Domini in Pascha in festo Sancti Johannis et Sancti Michaelis compotum reddant abbati vel ejus assignato et quatuor monachis predictis presentibus aliquibus de senioribus de domo eadem et retentis rotulis receptorum et expensarum usque in finem anni ut de statu monasterii circa meliorationem vel deteriorationem in fine anni conventui possit liquere Similiter ad compotum eodem modo et eisdem terminis reddendum tam ipse abbas quam omnes obedientiariis monasterii de omnibus receptis et expensis eodem modo et ordine quo facte fuerant teneantur Item precipimus quod refectorio coquine infirmarie et camere competenter provideatur secundum facultates monasterii ne per necessariorum defectum servos Dei contingat murmurare vel aliquid exterius minus honeste procurare Item decrevimus quod in singulis officiis diligentes et idonei officiales preficiantur Item quod debitus numerus monachorum gratis adimpleatur Omnia autem hec decrevimus et in virtute obedientie injungimus observanda non intendentes in aliquo regule beati Benedicti derogare precipientes quod hoc scriptum nostrum ter in anno presenti [per] abbatem coram conventu ne per oblivionem aliquid negligatur terminis competentibus recitetur retenta nihilominus nobis potestate interpretandi relaxandi corrigendi et alia faciendi que utilitati ipsius monasterii viderimus expedire In cujus rei testimonium presenti scripto sigillum nostrum duximus apponendum Item compertum est quod non sunt bursarii nec celerarii constituti secundum quod per bone memorie W predecessorem nostrum extitit constitutum unde quia ipsius statuta que inspeximus consignata utilia fieri monasterio et honesta ea precipimus sub anathematis pena firmiter observari et in capitulo recitari secundum quod in eisdem plenius continetur Istud fuit transcriptum in capitulo de Seleby xij kalendas Martii pontificatus J Dei gratia Eboracensis archiepiscopi Anglie primatis secundo