Charter Document - 07010842

Noverint universi quod ita convenit inter dominos Walterum Eboracensem archiepiscopum et Robertum Lincolniensem episcopum de triginta tribus acris prati in prato quod vocatur Estmerse quas idem archiepiscopus et predecessores sui ab antiquo habuerunt per particulas inter prata dicti episcopi et hominum suorum de Fenton videlicet quod idem episcopus de consensu Henrici decani et capituli Lincolniensis concessit dicto archiepiscopo et successoribus suis et ecclesie Eboracensis triginta sex acras prati continue jacentes juxta pratum de Latterton ex parte boreali extendentes in longitudine a fossato inter pratum et pasturam usque ad Landsik versus orientem in excambium dictarum triginta et trium acrarum prati perpetuo possidendas Et cum frequens contentio esset inter homines de Lanum et de Fenton de termino ponendi dictum pratum de Estmersk in defenso ita fuit utrinque concessum scilicet quod prefati episcopus et successores sui et homines eorum libere sine contradictione dictorum archiepiscopi et hominum suorum de Lanum pascere possint pratum suum quamdiu voluerint et pratum in defenso ponere statim post Purificationem Beate Marie et bis in anno falcare si viderint expedire Et dictus archiepiscopus et successores sui et homines eorum de Lanum libere et sine contradictione dicti episcopi et hominum suorum pascere possint dictum pratum sibi in excambium assignatum quamdiu voluerit archiepiscopus et idem pratum in defenso ponere statim post Purificationem Beate Marie et bis in anno falcare si viderint expedire ita quod post fena asportata animalia de Lanum exceptis porcis pascant communiter totum dictum pratum de Estmerse cum animalibus dicti episcopi et hominum suorum exceptis porcis usque ad Purificationem Beate Marie Sciendum etiam quod si averia archiepiscopi vel hominum suorum in pratum dicti episcopi vel hominum suorum vel averia dicti episcopi vel hominum suorum in pratum dicti archiepiscopi per evasionem in tempore defensionis intraverunt inde sine lesione et occasione curialiter effugabuntur Si autem per wardam factam imparcabuntur et tunc secundum legem terre et consuetudinem patrie deliberabuntur Licebit etiam dicto archiepiscopo et successoribus suis quando voluerint predictum pratum suum includere haia vel fossato salva tamen commune dicto episcopo et hominibus suis per competentem ingressum sicut superius est expressum Licebit etiam dicto episcopo et successoribus suis quando voluerint pratum includere haia vel fossato salva tamen commune dicto archiepiscopo et hominibus suis per competentem ingressum sicut superius est expressum Et ut predicta perpetuam obtineant firmitatem factum est hoc scriptum in modum cirographi cujus una pars sigillis dicti episcopi et capituli Lincolniensis et altera pars sigillis archiepiscopi et capituli Eboracensis est signata Acta mense Julii anno Domini MCC quinquagesimo tertio