Charter Document - 07010634
| Charter Number: | 07010634 |
|---|---|
| Cartulary Title: | The Register, or Rolls, of Walter Gray, Lord Archbishop of York |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1255 |
| Date type: | Internal, Calendar, Papal |
| Resource Link(s): |
|
Charter:
Alexander episcopus servus servorum Dei venerabili fratri Waltero Eboracensi archiepiscopo salutem et Apostolicam benedictionem Ex parte tua nobis extitit humiliter supplicatum ut cum nonnulli clerici tue civitatis et dioeceseos pro manifesta concubinarum cohabitatione nonnulli vero pro eo quod se fecerint ab alienis episcopis absque licentia tua ordinari latas contra tales suspensionis et excommunicationis sententias incurrerint et eorum aliqui sacros susceperint ordines et Divina celebrarint officia sic ligati saluti eorum consulere in hac parte paterna sollicitudine curaremus nos itaque tue devotionis precibus inclinati presentium tibi auctoritate concedimus ut predictos clericos hac vice absolvere valeas juxta formam ecclesie vice nostra proviso quod concubinarii a se concubinis prorsus abjectis sufficientem cautionem exhibeant quod illas vel alias non resumant Dispensandi preterea cum illis qui facti immemores vel juris ignari sacros susceperunt ordines vel ministrarunt in illis post injunctam in eis penitentiam competentem prout eorum saluti expedire videris tribuimus liberam facultatem Si qui vero talium scienter celebrare non tamen in contemptum clavium hujusmodi presumpserit eum per biennium ab ordinum executione suspendas injuncta eis penitentia salutari Qua peracta si fuerint bone conversationis et vite liceat tibi dispensare cum eis prout secundum Deum videris expedire Datum Neapoli id Januarii pontificatus nostri anno primo