Charter Document - 07010627

Walterus Dei gratia Eboracensis archiepiscopus Anglie primas omnibus Christi fidelibus ad quos presens scriptum pervenerit salutem in Domino sempiternam Noveritis quod cum viri religiosi Robertus prior et conventus Sancti Oswaldi de Nostle nolentes quod Eboracensis ecclesia lesam se dicens causam haberet conquerendi de ipsis quasi alienationem aliquam procuraverint in ipsius prejudicium et gravamen per hoc quod ab Apostolica sede ipsis ad eorum instantiam est concessum quod ecclesias de Boulton de Suthkirkeby de Rouwelle cum vacaverint in proprios usus suos possint convertere super premissis necnon et super ecclesiis de Wyverthorp Tikhill et medietate ecclesie de Mekeburgh ad eorum presentationem spectantibus nostre ordinationi faciende de consilio discretorum virorum W decani et R thesaurarii Eboracensium se absolute et simpliciter commisissent nos habita super hoc deliberatione de consilio predictorum decani et thesaurarii assensu capituli nostri Eboracensis accedente de eisdem ordinavimus in hunc modum videlicet de Tikhill Suthkirkeby et de Rouwell ecclesie cum vacaverint in ipsorum prioris et conventus proprios usus cedant ab ipsis post earum vacationem inperpetuum possidende salvis vicariis in eisdem secundum quod inferius sunt taxate ut augmentatis per earum appropriationem eorum facultatibus manus caritatis extendere possint ad Christi pauperes largiores ac iidem canonici in ecclesiis de Tikhill Rouwell Bouelton Wyverthorp et medietate ecclesie de Mekesburgh pensiones recipiant quas de eisdem hactenus perceperunt quousque aliqua predictarum trium ecclesiarum quas eisdem appropiavimus vacet et ad manus deveniat eorundem In quarum quamlibet cum vacaverit libere ingredi eis auctoritate propria concedimus facultatem ita quod extunc omnino evacuetur et cesset pensionum solutio predictarum Prefatam autem medietatem ecclesie Mekesburgh quam dicti canonici aliquamdiu de nostra gratia tenuerunt archidiaconatu Eboracensi adjunximus ut archidiaconi qui pro tempore fuerint se ibidem in suo recipere valeant cum per partes illas transierint pro visitationis officio exercendo Decedentibus siquidem vel cedentibus rectoribus dictarum trium ecclesiarum scilicet Tykhill Suthkirkeby et Rouwell dicti prior et conventus ad vicarias earundem presbyteros idoneos presentabunt facturos residentiam continuam in eisdem Vicaria de Tykhill sit taxata quod vicarius ad sustentationem sui et unius socii sacerdotis diaconi et subdiaconi et ad sustentanda omnia onera ecclesie debita et consueta habeat totum alteragium ita quod nomine alteragii contineantur omnes obventiones decime et proventus ipsius ecclesie de Tykhill exceptis decimis bladi et leguminis et feni et terris ad dictam ecclesiam pertinentibus salvo competenti manso vicario assignando Que quidem decime garbarum et feni cum predictis terris dictis priori et conventui remanebunt in capella de Stayneton cum habeat baptisterium et cimiterium propter distantiam a matrice ecclesia sit vicarius perpetuus qui ad sui sustentationem et luminarium et aliorum necessariorum in capella habeat totum alteragium de Stayneton cum terris ad capellam pertinentibus memoratam Vicaria de Suthkirkeby talis sit qualis fuit tempore Henrici de Oxonia qui fuit vicarius in eadem Et vicarius habeat secum unum socium sacerdotem et sustineat omnia onera ecclesie debita et consueta Vicaria de Rouwell consistet in alteragio ejusdem ecclesie ita quod vicarius eidem deserviens ad sui et unius socii sacerdotis sustentationem habeat totum alteragium cum manso competenti per priorem et conventum assignando priori et conventui remanentibus decimis bladi et leguminis et omnibus terris ad dictam ecclesiam pertinentibus excepto manso dicti vicarii ut supradictum est Et idem vicarius sustinebit omnia onera dicte ecclesie debita et consueta Donationem autem ecclesie de Boultona nobis et successoribus nostris archiepiscopis Eboracensibus inperpetuum reservamus Et ne Eboracensis ecclesia ex hac nostra ordinatione ledatur ecclesiam de Wyverthorp salvis competentibus vicariis tam in matrice ecclesia quam in capella de Helperthorp commune Eboracensis ecclesie inperpetuum assignamus eandem sic onerando communam quod postquam dicta ecclesia de Wyverthorp vacaverit et in utilitatem dicte commune fuerit conversa canonicus Eboracensis qui nomine prebende tantum sex marcas recipere consueverat de commune triginta marcas duntaxat annuatim eodem nomine extunc percipiat de eadem In matrice ecclesia de Wyverthorp sit vicarius perpetuus sacerdos residens qui ad sui et unius socii sacerdotis sustentationem et ad onera archidiaconalia et omnia alia debita et consueta sustinenda habeat viginti quatuor marcas in certis proventibus ei per capitulum Eboracense assignandas de ecclesia memorata et in capella de Helperthorp propter distantiam a matrice ecclesia sit vicarius sacerdos residens qui ad sui et clericorum suorum sustentationem ut plenius et honestius eidem capelle deserviatur habeat decem marcas in certis proventibus ei similiter assignandas per capitulum memoratum Ut autem que in hac parte facta sunt perpetue robur obtineant firmitatis ad rei geste et ordinationis predicte memoriam sempiternam hoc scriptum duplicatum tam nostro sigillo quam sigillo capituli nostri et sigilli dictorum prioris et conventus ac signis decani et thesaurarii Eboracensium quorum in hoc facto consiliis usi sumus fecimus sigillari Datum apud Eboracum xv kalendas Junii pontificatus nostri anno tricesimo tertio