Charter Document - 07010614
| Charter Number: | 07010614 |
|---|---|
| Cartulary Title: | The Register, or Rolls, of Walter Gray, Lord Archbishop of York |
| Charter Language: | Latin |
| Charter Origin: | Religious |
| Charter Type(s): | Ordination |
| Date: | 1216 - 1255 |
| Date type: | Assigned |
| Resource Link(s): |
|
Charter:
Walterus Dei gratia Eboracensis archiepiscopus et Anglie primas universis sancte matris ecclesie filiis eternam in Domino salutem Cum ecclesia Sancti Mauricii in Neubigging in civitate Eboracensi ad duas prebendas Eboracensis ecclesie scilicet de Fridaithorp et de Fenton hactenus pertinere consueverit et res modica sit que sectionem de jure pati non debeat et ratione illius sectionis inter canonicos dictas prebendas tenentes discordia multotiens oriri posset nec quamdiu sit sub regimine duorum sufficienter serviatur eidem nos premissa diligenter attendentes de consensu capituli predictam ecclesiam plene et integre cum omnibus ad illam pertinentibus unire et illam unitam prebende de Fenton perpetuo dignum duximus assignare In recompensationem autem rerum temporalium quas de bonis temporalibus dicte ecclesie canonicus prebende de Fridaythorp percipere consuevit omnes homines in vico de Neubigging et de Munkgate manentes de prebenda de Fenton tenentes sine aliqua retentione cum reditibus et servitiis eorum et cum husgable et denariis Sancti Petri et mensuris et cum omnibus libertatibus et juribus et consuetudinibus que ad prebendam de Fenton spectare consueverunt prebende de Fridaythorp perpetuo curavimus assignare Ita tamen quod Lucas nepos magistri Roberti de Winton cantoris Eboracensis ecclesie tenebit tota vita sua domos et terras que fuerunt quondam Martini Cleterbelle et filie ejus reddendo per annum prebende de Fridaythorp firmam quam prefate terre reddere consueverunt prebende de Fenton Sublato vero Luca de medio prefate terre et domus plene et integre sine alicujus redditus diminutione redibunt ad prebendam de Fridaythorp Domum autem juxta ecclesiam Sancti Mauricii sitam quam magister Robertus de Winton cantor Eboracensis construxit et nepoti suo Benedicto contulit tenebit dictus Benedictus nepos ipsius tota vita sua reddendo prebende de Fridaythorp firmam quam terra illa reddere consuevit Quo viam universe carnis ingresso tota terra illa cum edificiis residebit sine aliqua contradictione ad prebendam de Fridaythorp Si tamen moriatur in vita Willelmi de Lanum canonici de Fridaythorp dictus Willelmus dabit fabrice ecclesie Sancti Mauricii centum solidos ratione sumptuum quos magister Robertus de Winton cantor ecclesie Eboracensis fecit in constructione prefate domus Si autem moriatur tempore alterius canonici illius prebende ille qui nunc erit canonicus dabit ecclesie Sancti Mauricii decem libras Teste Capitulo Eboracensi cujus assensus et testimonium per sigilli sui appositionem declaratur