Charter Document - 07010612
| Charter Number: | 07010612 |
|---|---|
| Cartulary Title: | The Register, or Rolls, of Walter Gray, Lord Archbishop of York |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1239 |
| Date type: | Internal, Calendar, Papal |
| Resource Link(s): |
|
Charter:
Gregorius [] archiepiscopo Eboracensi Significantibus dilectis filiis abbate et conventu monasterii Sancti Michaelis de Periculo Maris nobis innotuit quod cum olim clare memorie Comes Britannie manerium de Wat situm in Eboracensi dioecesi eidem monasterio pietatis intuitu contulisset illudque confirmantibus sibi regibus Anglie a tempore cujus non extat memoria usque nunc pacifice possederint et quiete ac duos semper habuerint monachos in eodem Robertus Marmion miles Eboracensis dioecesis manerium ipsum ad se ratione uxoris sue falso spectare proponens super quo quondam abbatem ejusdem monasterii predecessorem abbatis predicti coram carissimo in Christo filio nostro illustri rege Anglie fecit ad judicium evocari coram quo dictus miles deficientibus aliis probationibus quod prefatum manerium pertinebat ad eum se probaturum obtulit per duellum quod protinus dictus predecessor tanquam simplex et juris ignarus non requisito sui conventus consensu quamquam alias defensiones haberet indiscrete subire promisit Cumque postmodum dicto milite congregante ad locum certaminis ab eodem rege partibus deputatum multitudinem armatorum utriusque pugiles inter se aliquamdiu dimicassent et ipsius militis pugil semel et iterum fuerit dejectus ad terram quia pars ipsius militis quotiens dictus pugil succumbebat totiens violenter sublevabat eundem nihilominus mortem dictis abbati et pugili comminando supradictus predecessor ex hujusmodi duello metuens non solum irregularitatem sed mortem incurrere ad predictum certaminis locum accessit et ibi per talem metum qui cadere potuit non immerito in constantem renuntiavit publice juri suo cujus renuntiationem miles ipse admittere noluit nisi sub pretextu pacis et compositionis quandam pecunie summam prius reciperet ab eodem Quare dicti abbas et conventus nobis humiliter supplicarunt ut cum talis renuntiatio presumpta sine consensu conventus non debeat de jure teneri pro qua etiam monasterium supradictum noscitur enormiter esse lessum providere super hoc misericorditer curaremus Quia vero nobis non constitit de premissis mandamus quatenus premissa constitutione inquiras super premissis diligentius veritatem et causam ipsam sufficienter instructam ad nostram presentiam remittere non postponas prefigendo partibus termino peremptorio competenti quo per se vel per procuratores idoneos compareant coram nobis justam dante Domino sententiam recepture Datum Laterani iiij kalendas Martii anno duodecimo