Charter Document - 07010603

Omnibus Christi fidelibus has literas inspecturis Walterus Dei gratia Eboracensis archiepiscopus Anglie primas salutem in Domino Ad universitatis vestre notitiam volumus pervenire nos tam auctoritate domini pape qua fungimur in hac parte quam ordinaria de consensu rectorum et patronorum ecclesie Sancte Marie de Notingham intuitu caritatis concessisse fratribus hospitalis Sancti Johannis de Notingham quod habeant capellam et capellanum eis et hospitibus suis Divina in eadem ministrantem salva in omnibus indemnitate ecclesie Beate Marie in cujus parochia situm est hospitale circa perceptionem omnium proventuum occasione celebrationis Divinorum in eodem hospitali quacunque causa provenientium Ita quidem quod capellanus qui pro tempore fuerit sive religiosus seu secularis priori et conventui de Lenton juratoriam cautionem inspectis sacrosanctis prestabit quod in nullo ecclesiam dictam defraudabat commodo aliquo temporali nec ad annuale seu tricenale seu septe annale seu anniversarium seu etiam aliquod hujus nomine de ipsa parochia suscipiet pro denariis decantandum Is autem qui rector vel magister dicti hospitalis pro tempore fuerit inspectis sacrosanctis jurabit quod nihil in prejudicium matricis ecclesie propter cantariam dicto hospitali in posterum concessam procurabit nec quatenus in se est procurari permittet Concessimus etiam fratribus ejusdem hospitii ut habeant cimiterium ad sepeliendum corpora fratrum suorum ibi vel alibi defunctorum Nos autem fratres interpretamur qui in incolumitate vel etiam in egritudine sui compotes per visum rectorum et sacerdotum ecclesiarum quarum fuerint parochiani cum eis plene satisfactum fuerit de omni jure parochiali publice habitum dicti hospitalis ad seculum ulterius non reversuri susceperint Alienos autem parochianos nec ad confessionem nec ad eucharistiam nec ad sepulturam dicti sacerdos magister vel fratres admittent Dicti autem fratres habeant tintinnabulum supra tectum hospitalis ad convocandum fratres ad Matutinas ad Horas ad Missam ad Vesperas ad Completorium Et si illud forte confringi contigerit aliud ejusdem ponderis et magnitudinis ibidem renovetur Die vero Sancti Johannis Baptiste Divina celebrabit in dicto hospitali perpetuus dicte ecclesie vicarius vel aliquis ex parte sua qui omnes oblationes recipiet sicut et alias oblationes quacunque causa quacunque parte anni provenientes in dicto hospitali percipiet Diebus festivitatum Beate Marie non celebrabuntur Divina in dicto hospitali nisi januis clausis et voce submissa Memorati vero fratres hospitalis in recompensationem oblationum et obventionum quas ante presentem ordinationem facere consueverunt unam marcam argenti singulis annis dabunt ecclesie matrici ad duos terminos videlicet infra octabas Inventionis Sancte Crucis dimidium marcam et infra octabas Sancti Martini dimidium marcam Dicti autem fratres hostium versus villam in capella non habebunt exterius Quod si sacerdos magister vel fratres in aliquo predictorum confessi vel convicti fuerint excessisse per archidiaconum Notingham si presens fuerit in archidiaconatu suo vel in ejus absentia per decanum loci canonice punientur Iidem vero fratres pro se et successoribus suis renuntiaverunt impetrandis contra hanc ordinationem In cujus rei memoriam perpetuam huic scripto residenti penes magistrum et fratres hospitalis sigillum nostrum una cum sigillis prioris et conventus de Lenton et vicarii Beate Marie duximus apponendum Data apud Lanum die festivitatis Beati Andree anno ab Incarnatione Domini MCCXXX quarto